Најлоша зима за британските фабрики во последните 50 години

Компанијата Фрог, производител на детски велосипеди во Обединетото Кралство (ОК), од своето основање во 2013 година до пандемијата бележи раст на приходите од продажба и се прошири на дури 50 пазари. Меѓутоа, оваа година нејзините трошоци за енергија се зголемија за 333 отсто.

Еден од основачите, Џери Лоусон, рече дека комапнијата морала да ги покачи цените на своите производи за 14 отсто и дека бара дополнителни начини да заштеди. „Исто така размислуваме и за отпуштања“, додаде Лоусон, кој раководи со компанијата во која што работат околу 90 луѓе.

Секторот за производство во ОК се наоѓа во проблеми. Последните податоци покажуваат дека е намалено темпото на производство, ниво што не е видено од најригидните затварања за време на пандемијата.

„Компаниите добиваат драстично помалку нарачки, како од домашниот, така и од странските пазари“, се наведува во извештајот за компании на S&P Global и Chartered институтот за набавки и понуди.

Фунтата, која што од јануарките 1,37 долари ослабна на 1,16 долари наизглед не помага при зголемување на извозот.

Пречка за слободната трговија се и растечките цени на енергенсите, рецесијата која што е на повидок, како и штрајковите. Сето тоа потсетува на седумдесетите години од минатиот век кога производството во Британија значајно опадна.

Рестрикции

Исто така, повторно би можело да дојде до рестрикции во снабдувањето со електрична енергија, а од владата се подготвуваат за тоа и покрај повторното пуштање во погон на електраните на јаглен.

Какви било рестрикции би претставувале ризик за индустријата која што бара постојана достапност на енергенси. За гасење на печките за производство на цигли, плочки и производи од керамика се потребни и до две недели, рече Роб Флело, генерален директор на компанијата British Ceramic Confederation. Сите рестрикции мора да бидат најавени и координирани меѓу владата и комапниите, рече Флело.

Далеку од тоа дека овој сектор е единствен на удар. Печките за производство на стакло „не може да бидат исклучени“, рече Дејв Далтон, водечки човек на компанијата British Glass. „Оштетувањата што може да настанат само два часа по прекин на дотокот на гас би можело да резултираат со трајни дефекти“, предупредува Далтон.

Капката што ја прелива чашата

Ограничувањата на цената на енергенсите се однесува на домаќинствата, а не на компаниите, така што компаниите не се заштитени од растечките цени на глобалниот пазар. Некои фабрики веќе подлегнаа на притисокот. Претходно, во текот на летово, компанијата за печатење паричници, De La Rue Plc, рече дека ќе ја затвори својата фабрика во градот Овертон, каде што има 300 работници.

„Последната капка е истекувањето на договорот за снабдување со енергија“, објасни Стив Фриман од организацијата Confederation of Paper Industries. „Едноставно не можеа само така да ги пренесат трошоците на клиентите. Така што тоа беше капката што ја прели чашата“, рече Фриман.

За сега, од владата велат дека приоритет е да се обезбеди „доволна количина енергенси“, а портпаролот додаде дека надлежните се во постојан контакт со претставниците на компаниите.

Новиот премиер на државата, чие име ќе биде познато на почетокот од следната недела, веројатно ќе мора да потпише сеопфатен пакет мерки за поддршка на домаќинствата и комапниите, кои се борат со историски високите цени на енергените. Фабриките се надеваат дека ќе се најдат на почеток на редот за државна помош.