ЕУ членките бараат начин да воведат данок и покрај ветото од Унгарија

Членките на Европската Унија (ЕУ) бараат начини како да го имплементираат договорот за оданочување на големите мултинационални компании со минимален данок од 15 отсто, почнувајќи од 2023 година. Ова се случува наспроти цврстиот став на Унгарија, која е против и продолжува да става вето на заедничкото решение на Унијата.

Министрите за финансии на петте најголеми економии во ЕУ на состанокот во Прага денеска изјавија дека ќе ја зајакнат својата посветеност на имплементација на планот, работејќи на алтернативи, кои би ја исклучиле Будимпешта.

„Ако едногласно не се постигне договор во следните недели, нашите влади целосно се одлучни да ја исполнат целта“, се наведува во соопштението од Германија, Франција, Италија, Шпанија и Холандија, „Подготвени сме да го спроведеме минималното ефективно оданочување во 2023 година преку сите можни правни средства“, пишува во соопштението од петте најголеми економии од ЕУ.

Политичките потешкотии во Европа фрлија сенка врз спроведувањето на широкиот даночен договор, постигнат минатата година, меѓу повеќе од 130 земји. Напредокот на тоа што беше поздравено како „револуција“, е забавен од технички потешкотии во поглед на новите правила, што одредуваат кои земји може да ги оданочуваат мултинационалните дигитални компании.

Пред унгарското вето во јуни, што беше ставено буквално во последен момент, ЕУ беше близу до договор за хармонизирана имплементација на делови од глобалниот план, што би значело ефективно оданочување на добивката на компаниите од 15 отсто.

Германската коалициска влада веќе започна со подготовка на национален закон, што би можел да се користи ако е потребно, изјави претходно министерот за финансии на таа држава, Кристијан Линднер.

„Силно го поддржуваме европскиот пристап. Се обидуваме да ги увериме државите членки, особено една, но носиме одлука за спроведување на минималното оданочување во Германија ако нема заеднички јазик за тоа“, рече Линднер, додавајќи дека и други држави се подготвени за сличен пристап.

Францускиот министер за финансии, Бруно Ле Мар, рече дека и неговата влада, исто така, е подготвена да ја користи националната одредба, а дека друга опција би можело да биде употреба на механизмот што ЕУ го нуди, на принципот на „засилена соработка“ меѓу одреден број членки.

„Сега е време да ја имплементираме оваа одлука, не треба да дискутираме, треба да донесеме одлука“, рече Ле Мар.

Во моментов нема коментари за веста. Биди прв да коментира...

Остави коментар