Кристин Лагард размислува порано да ја напушти ЕЦБ

Претседателката на Европската централна банка, Кристин Лагард, според „Фајненшл тајмс“, се очекува да се повлече од својата функција пред истекот на нејзиниот осумгодишен мандат во октомври 2027 година.

Лагард сака да замине пред претседателските избори во Франција во април следната година, што би му овозможило на францускиот претседател Емануел Макрон и германскиот канцелар Фридрих Мерц заеднички да најдат нејзина замена, наведува извештајот, повикувајќи се извори блиски до Лагард. Сè уште не е јасно кога точно би можела да се повлече.

„Претседателката Лагард е целосно фокусирана на својата мисија и нема донесено никаква одлука во врска со крајот на нејзиниот мандат,“ изјави портпарол на ЕЦБ во соопштение.

Лагард претходно беше поврзувана со можно предвремено заминување од ЕЦБ, но минатиот јуни ги отфрли шпекулациите дека планира да ја преземе водечката позиција во Светскиот економски форум, нагласувајќи дека е „целосно решена да ја исполни својата мисија и да го заврши мандатот.“

Во поново интервју за „Блумберг телевизија“ таа изјави дека „не е човек што се откажува,“ додавајќи дека била изненадена кога дознала, при прифаќањето на функцијата во 2019 година, дека мандатот трае осум години, а не пет.

Шпекулациите повторно се засилија по најавата дека гувернерот на Банката на Франција, Франсоа Вилероа де Галхау, ќе ја напушти функцијата предвреме, што му дава можност на Макрон да назначи наследник пред изборите следната година, кои би можело да ги добие крајната десница.

Одлука за позицијата на Лагард обично се носи во лето пред истекот на мандатот. Но европските влади можат да изберат да го забрзаат процесот за да избегнат да се соочат со Марин Ле Пен или нејзиниот протеже, Жордан Бардела.

Шпанија е подготвена доколку Европа го забрза распоредот, изјави оваа недела министерот за економија Карлос Куерпо, нагласувајќи ја желбата на неговата земја „да игра водечка улога во новиот Извршен одбор кога ќе се обноват отворените позиции.“

Шпанецот Пабло Ернандез де Кос - кој моментално ја предводи Банката за меѓународни порамнувања - е меѓу фаворитите за наследник на Лагард, заедно со поранешниот шеф на холандската централна банка Клаас Кнот, според анкета на „Блумберг“.

Претседателот на Бундесбанк Јоаким Нагел и членката на Извршниот одбор Изабел Шнабел исто така изразиле интерес.

Сепак, нема консензус околу тоа кога да се решава прашањето за наследството во ЕЦБ. Австрискиот министер за финансии Маркус Мартербауер во понеделникот изјави дека го поддржува задржувањето на стандардниот распоред за назначување наследник на Лагард.

Неговиот германски колега, Ларс Клингајл, исто така нагласи: „ЕЦБ има распоред, и ние ќе се придржуваме до него и - како и секогаш - ќе најдеме добро решение.“

Францускиот министер за финансии Роланд Лескјур одби да одговори на тоа прашање, велејќи едноставно дека Лагард е „очигледно одлична претседателка на ЕЦБ.“