Банкарскиот сектор се справува со предизвиците наметнати од воениот конфликт, покажуваат анализите на Народната банка во Извештајот за ризиците во банкарскиот систем за вториот квартал од 2022 година кој бил усвоен вчера. Од Народната банка велат дека мерките кои ги презеле за стабилизирање на неповолните очекувања на населението настанати по избивањето на воениот конфликт, овозможиле стабилизирање на движењата кај депозитната основа. Депозитите на домаќинствата пораснале во вториот квартал, со што годишната стапка на раст изнесува 5,2 проценти. Кредитирањето пораснало како и во првиот квартал односно 10 отсто. За зголеменото кредитирање во вториот квартал подеднаков придонес имале и корпоративниот сектор и секторот домаќинства.
„Солвентноста на банкарскиот систем е солидна и забележа подобрување во однос на претходниот квартал, со стапка на адекватност на капиталот од 17,3 проценти. Показателите за ликвидноста и натаму се на задоволително ниво, иако умерено се намалени во однос на претходниот квартал. Банките одржуваат ликвидност што е повисока за 2,5 пати од регулаторниот минимум (100%). Резултатите од стрес-тестовите упатуваат на задоволителна отпорност на банкарскиот систем на претпоставените екстремни, поединечни и комбинирани ликвидносни одливи. Квалитетот на кредитното портфолио на банките и натаму е солиден, со учество на нефункционалните во вкупните кредити од 3,2 проценти, што е пониско од претпандемичното ниво, стои во Извештајот за ризиците во банкарскиот сектор.
На седницата, Советот ја разгледал редовната квартална оцена на цикличниот системски ризик, врз основа на којашто се утврдува висината на стапката на противцикличниот заштитен слој на капиталот.
„Најновите оцени покажаа дека банкарскиот сектор и натаму е здрав и стабилен, со задржана отпорност на шокови. Но, тој и натаму работи во неизвесно окружување што постепено ги зголемува системските ризици, што наметнува потреба од натамошно претпазливо планирање на капиталните позиции на банките. Имајќи ги предвид ваквите околности, Советот донесе одлука со којашто ја потврди претходно утврдената стапка на противцикличниот заштитен слој на капиталот за изложеностите на банките во Република Северна Македонија од 0,5 отсто. Исто така, со новата одлука на Советот се предвиде да се применат и стапките на противцикличниот заштитен слој на капиталот што се утврдени од надлежните органи на другите земји за изложеностите на домашните банки кон клиенти од други земји. Со ова се постигнува натамошно усогласување со регулативата на Европската Унија, а се придонесува за подобро управување со ризиците што се специфични за одделните банки, коишто произлегуваат од нивните изложености кон клиенти од други земји. Банките се должни да ги применуваат овие стапки почнувајќи од 1 октомври 2023 година, стои во извештајот.
Советот на Народната банка ја разгледа и Месечната информација за најновите макроекономски показатели, како и други материјали поврзани со активностите во банката.
.webp){kind=icon}
