.webp){kind=icon}
Високата инфлација предизвикана од промените во снабдувањето, геополитичките тензии по инвазијата на Русија во Украина предизвика сериозни промени во економските текови во земјите глобално. Во Македонија беше измерена рекордно висока стапка на инфлација во септември од 18,7 проценти, а според статистиката најголем раст има кај храната. На годишно ниво лебот има највисок раст на цената од 47,7 отсто со што веќе ја надмина цената на маслото чија цена годинава уриваше рекорди.
Блумберг Адриа и досега анализираше зошто е растот на цените во земјава со толкав квантитет, но исто така и кој е квалитетот на инфлаторните движења. Поради високата цена на брашното поскапеа пекарските производи, па во овој текст ќе ги анализираме финансиските показатели на две од најпознатите и најголеми скопски пекарници - „Силбо“ и „Специјал“.
Станува збор впрочем за три фирми затоа што „Силбо“ има две фирми во Скопје кои имаат и различни сопственици - браќата Силјан и Боби Милеви. Жито Скопје Силбо ДООЕЛ на Силјан Милев е средна компанија која има 150 вработени во 2021 година. Додека Жито Клас Силбо ДООЕЛ на Боби Милев минатата година има 83 вработени. Помалата односно компанијата која има помалку вработени, а секако и помал капитал и помалку средства, има брилијантна година зад себе ако добивката е критериум односно има фантастичен раст на добивката.
Заедно двете компании имаат вкупни приходи во 2021 година од над 350 милиони денари, а двете друштва обезбедиле вкупна добивка од работењето од речиси 700.000 евра. Инаку и двете се регистрирани на иста адреса во скопско Горно Лисиче.
Третата компанија која ја анализираме е Специјал Продукт ДООЕЛ Скопје. Ова е фирма која во 2021 година вработувала 243 луѓе и една од најуспешните домашни компании во оваа индустрија односно во производство на леб, пецива и колачи.
Како одработе Специјал во 2021 година и кои се трендовите?
Според финансиските извештаи компанијата Специјал Продукт ДООЕЛ Скопје во 2021 година има вкупни приходи од речиси 260 милиони денари (4,2 милиони евра) што е за 30 проценти повеќе од 2020 година. Ова е најдобар резултат од 2018 година наваму, единствено што во 2019 и во 2020 година, инаку пандемиски години, приходите на годишно ниво се намалувале. Вкупните трошоци на „Специјал“ во 2021 година изнесуваат 255,7 милиони денари (4,16 милиони евра) што е за 31 отсто повеќе од претходната 2020 година. „Специјал“ ја завршил годината со добивка од речиси 4 милиони денари (64.139 евра) што е за 12 отсто повеќе од 2020 година. Сепак добивката во 2020 година изнесува 3,5 милиони денари (над 57 илјади евра) и е за дури 59 отсто помалку од финансискиот резултат во 2019 година.
Од трендовите во финансиските извештаи се гледа дека компанијата има просечно ниво на долг, просечна ликвидност и нема проблем за сервисирање на долговите. „Специјал“ има ниска кредитна изложеност од операците и работи со ниска профитна маржа.
„Жито Скопје Силбо“ и „Жито Клас Силбо“
Вкупните средства на Жито Скопје Силбо на Силјан Милев во 2021 година изнесуваат 156 милиони денари. Компанијата со 150 вработени и три продужници во 2021 година има вкупни приходи од 160,3 милиони денари (2,6 милиони евра), а трошоци од 142 милиони денари (2,3 милиони евра). Оваа компанија успеала во 2021 година од продавање леб и бели пецива да оствари добивка во 2021 година од 17,7 милиони денари (речиси 289 илјади евра).
Другата компанија со која раководи Боби Милев е Жито Клас Силбо. Вкупните приходи во 2021 година изнесуваат 187 милиони денари (три милиони евра), а компанијата остварила добивка од 24,9 милиони денари (404 илјади евра) што е за фантастични 67 проценти повеќе од претходната 2020 година.
