Енергетичарите се задоволни од понудената помош од Европската Унија (ЕУ) за справување со енергетската криза. Според најавите, пакетот помош од 80 милиони евра на Македонија би требало да и биде на располагање кон крајот на годинава или почетокот од следната.
Според енергетскиот консултант Митко Андреевски, кој зборуваше за Блумберг Адриа ТВ, од поголема важност е пакетот помош од ЕУ во висина од 500 милиони евра наменет за инвестиции за меѓусебно поврзување на државите од Западен Балкан.
„За нас, како држава, тоа е од исклучителна важност бидејќи знаете дека ние сакаме да станеме транзитна земја за испорака на природен гас, пред се мислејќи на конекцијата со грчкиот преносен систем оператор за природен гас и исто да ја развиваме конекцијата со Србија и Косово“, вели Митко Андреевски, енергетски консултант.
Заедничката набавка на природен гас е старо барање на помалите членки од ЕУ, бидејќи имаше различна цена во различните земји од ЕУ, вели Андреевски.
„На пример, ако во Германија 1.000 кубни метри гас чинеа помалку од 100 евра, во Бугарија чинеа 170 евра и затоа тоа се повеќе од десетгодишни заложби на послабо развиените економии во ЕУ. За нас многу ќе значи да имаме заедничка набавка на природен гас. Очекувам дека од следната година ќе имаме таква можност. Тоа ќе ни даде сигурност и пред се' ќе обезбеди исти цени за сите земји од Европа“, вели Андреевски.
Тој се надева на зима без рестрикции и порачува да се сменат приоритетите на Македонија и да се забрза транзитот од употреба на јаглен кон обновливи извори на енергија.
„Цените во последните неколку дена во цела Европа бележат драстичен пад, како на електричната енергија, така и на природниот гас. Тоа се случува од две причини. Прво, складиштата за гас во ЕУ се наполнети и второ, имаме ретко топла есен. Како ќе биде во декември и јануари е неблагодарно да се каже“, вели Андреевски иако очекува максимално користење на расположливите капацитети, рационално трошење на струјата и добри временски услови.
.webp){kind=icon}
