На седница на Владата денеска ќе се разгледува буџетот за следната година, дознава „Блумберг Адрија“.
Во текот на денот се очекуваат повеќе детали за конкретните мерки и чекори за кои ќе стане збор.
Министерот за финансии, Фатмир Бесими, претходно најави дека кон крајот на октомври буџетот за 2023 година ќе биде доставен до Владата.
Проекциите за економскиот раст, како што нагласи Бесими, се оптимистички, меѓу 2,9 и 3,1 отсто.
„Се очекува инфлацијата идната година да се ублажи и да биде под просекот од 11,6 проценти, колку што е сега, до август. Варијациите се од пет до осум отсто, но калкулациите сè уште се различни“, рече Бесими, нагласувајќи дека земјава ќе ги усогласи проекциите со ММФ, и во однос на растот и во однос на инфлацијата.
Според министерот, ќе се разгледуваат сите опции за финансирање идната година, дури и можноста за прва обврзница со клаузула долар.
„Ако се покаже потреба за таков пристап, државата ќе го направи тоа“, рече Бесими.
Владини извори минатиот месец брифираа дека ќе се оди со понизок буџетски дефицит во однос на лани.
„Во однос на минатата година, според првичните проекции, се оди со понизок буџетски дефицит. Годинава, буџетскиот дефицит е 5,3 проценти од БДП, а сега ќе биде меѓу 4,2 и 4,6 проценти, во зависност какви ќе бидат проекциите, односно какви ќе бидат стапката на инфлација и динамиката на раст“, посочија изворите.
.webp){kind=icon}
