.webp){kind=icon}
Реинвестираната добивка нема да се даночи, даночоњето на каматите од орочените депозити ќе се применува по влезот во Европска унија, а капиталната добивка ќе се даночи на годишно ниво, а не по трансакција.
ДДВ ќе се зголеми од пет на десет отсто за „екстравагантни и луксузни прехранбени производи како перки од ајкула, месо од делфин, тартуфи, хималајска сол или маслиново масло“, рече министерот за финансии Фатмир Бесими при образложувањето на даночната реформа која ќе стартува од Нова година. „Тој што има пари да јаде ајкулски перки од Атлантскиот океан, има пари да плати и повисок ДДВ“, рече министерот.
Прогресивниот данок се укинува и нема да се применува. Останува стапката од 10 отсто данок на личен доход за сите работници. Хонорарците ќе можат сами да си плаќаат придонеси, ако тоа го сакаат.
Ќе има поголеми давачки за менаџерите кои остваруваат немонетарни приходи. Односно ќе се плаќа данок за користење службено возило за приватни цели, потоа за стипендии за децата и становите и куќите во кои живеат. Сепак, не се знае колку ќе изнесува данокот по овој основ.
Дали ќе се даночат големите компании со данок на екстра профит е прашање за кое допрва ќе се разговара.
Од она што беше презенитано денеска се гледа дека Владата отстапи од многу делови на реформата што планираше да ги спроведе и наместо 100 милиони евра, ефектот врз буџетот ќе изнесува 70 милиони евра. Образложението е дека се прифатиле сугестиите на бизнис заедницата и експертите заради кризата.
„За 70 милиони евра, благодарение на оваа реформа ќе биде помало задолжувањето на државата“, рече Бесими.
Според премиерот, Димитар Ковачевски, вака конципираната даночна реформа ќе овозможи праведност во даночењето, подобра наплата на даноците и сузбивање на сивата економија.
„Со ваквата даночна реформа сакаме да постигнеме најдобра вредност за сите граѓани“, рече Ковачевски.
