Цената што е понудена овозможува да нема ценовен шок за граѓаните. Финалната цена, која се состои од три ценовни параметри што на крајот ги определува Регулаторната комисија за енергетика, овозможува да нема ценовен шок за граѓаните и, според првичните калкулации што се прават врз основа на овие параметри, овозможува дури намалување на цената на електричната енергија за малите потрошувачи, односно компаниите што вработуваат 98 проценти од вработените во државата, изјави премиерот Димитар Ковачевски.
За да го нема тој ценовен шок, како и досега, според Ковачевски, државата има определено финансиски средства во буџетот, како за 2022-та така и за 2023 година.
„Министерот за финансии и јас на прес-конференција за буџетот многу транспарентно информиравме дека веќе имаме ставено ставка во буџетот од 250 милиони евра за справување со економско-енергетската криза“, рече премиерот, кој присуствуваше на поставување камен-темелник на далновод во Овчеполието.
Тој додаде дека на крајот, кога ќе се прават финалните калкулации за производството на електрична енергија, движењето на цените на суровините, кое се прави на месечно ниво, ќе може да се каже и колку ќе биде финалната субвенција на државата што ќе му ја даде на ЕСМ за да овозможи пониска цена на електрична енергија за граѓаните.
„Инаку, од она што го имаме досега во 2022 година, Северна Македонија е држава што најдобро ја помина енергетската криза, односно најуспешно се справи од сите земји во регионот, со оглед на финансиските издатоци од буџетот и со оглед на непрекинатото снабдување со електрична енергија за граѓаните и недозволувањето да има ценовен шок за цената на електрична енергија на регулираниот пазар. Тоа е планот и за идната година“, истакна премиерот.
Ковачевски информира дека ЕСМ оваа година го зголеми производството за 22 процента, а за идната година исто така се планира зголемување на производството на ЕСМ.
.webp){kind=icon}
