.webp){kind=icon}
Граѓаните во 2023 година може да очекуваат стабилни цени на брашното и лебот, велат мелничарите. Тоа, нагласуваат, е последица, пред се, од донесувањето на владината одлука со која на компаниите им се овозможи да плаќаат струја по 80 евра за мегават час.
Претседателот на Групацијата на мелничко-пекарската индустрија, Горан Малишиќ, вели дека мелничката и пекарската индустрија се борат со сите можни зголемени трошоци за производство преку менаџирање на сопствените залихи на некој основен минимум, во очекување на намалени цени на пченицата што како услов би создало прилики за дополнителна стабилизација на цените и нивно намалување.
„Обезбедувањето струја по 80 евра за мегават час е правилна одлука што минусира еден негативен фактор поради кој се зголемуваат цените. Владата фактички спречи дополнителни зголемувања на малопродажните цени и ги намали за соодветниот трошок на електричната енергија“, истакнува Малишиќ.
Според него, во изминативе денови, цените на берзите и се намалуваат и се зголемуваат, но генерално, се движат во истите рамки.
„Тоа ни дава за право да сметаме на стабилен период до следната жетва, и поради тој факт, стабилен период на цените на суровините, со што последнично нема да предизвика зголемување на малопродажните цени. Како што и се гледа во малопродажните објекти, цените на брашното и основниот леб се намалени од 5 до 10 отсто, во зависност од компанијата производител“, нагласува претседателот на групацијата.
Се очекува по март цените на пченицата да одат во надолна линија со што се создаваат услови и за нормализирање на цените.
„Проблемот е што домашните и регионалните цени на пченицата се на исто ниво, дури и поголеми од светските берзи, што создаде негативни услови или услови на големо зголемување на цените. Изедначувањето на регионалните и светските цени се уште се одржува, но поради големите количини залиха на пченица во околните земји, се очекува во следниот период намалување кое ќе се одрази позитивно и за индустријата и за граѓаните“, објаснува Малишиќ.
