.webp){kind=icon}
Реномираните европски скијачки центри се соочуваат со топла и сува зима, па затоа луксузните одморалишта останаа неисполнети, особено во споредба со претходните години. „Блумберг“ минатата недела објави репортажа за ски-центрите во Франција и Швајцарија, каде што снег има само на највисоките делови. Според експертите, оваа година сезоната ќе биде најкратка досега.
Буквално до вчера ни во земјава немаше снег. Сепак, вчераутро на Попова Шапка се раздени во снег. Синоптичарите велат дека во наредните денови снег ќе паѓа повторно, но за што е доволна таа убавина? Ако се суди по претходните години, снегот на зимските туристички центри служи само за немасовни посети, индивидуални семејни излегувања, излети.
Од почетокот на оваа сезона, конкретно на Попова Шапка, жичницата работи, но само за панорамски прошетки. Загадениот воздух низ македонските градови го зголеми бројот на посетители во овој центар во текот на празничните денови, но главно тоа беа гости на еден ден.
„Блумберг Адрија“ анализира зошто Македонија, и покрај потенцијалот што го поседува, нема развиен зимски туризам. Зошто три децении толку малку се вложува во Попова Шапка, Маврово, Пелистер, Пониква, Кожуф? Дали најавената инвестиција од италијанската „Техно Алпин“ ќе го донесе шмекот на италијанските Доломити над Тетово?
Недостига и примарна и секундарна инфраструктура
Според експертите за туризам, за македонските зимски центри се потребни две работи – инвестиции и инфраструктура. Според нашите соговорници, доколку има хотели што ќе нудат повеќе од обично сместување, комплекси како во Банско или Златибор, тоа ќе биде голем чекор напред кон решение за проблемот.
„Хотели има, има десетина објекти што стојат со години и може да се реновираат наместо да се оди подлабоко во природата и да се градат нови. Со вложувањето во тие хотели треба да се овозможат повеќе содржини. Гостите сакаат по скијање да се релаксираат. Мора да им се овозможи спа, хотелите мора да имаат базени. Овие дополнителни содржини ја прават разликата. Ова е важно и за да се продолжи сезоната. Во Банско не можете да најдете слободна соба ниту во август. Затоа, по тој принцип, домашните хотелиери треба да обезбедат услови сместувачките објекти да бидат атрактивни цела година, а не само за време на зимските месеци“, вели Влатко Сулев, претседател на Националната асоцијација за дојдовен туризам (НАИТМ).
Влатко Сулев / Приватна архива
Според него, земјава има голем потенцијал за развој на туризам. Има одлични предели што би биле атрактивни за возење велосипеди или за планинарење, особено на Пелистер или на Пониква. Македонија може да биде интересна и од аспект на кулинарството. На туристите може да им се овозможат посети на селата, каде што ќе ги пробаат тамошните специјалитети. Но за да може да се направи сето тоа, најважна е инфраструктурата.
„Ние имаме проблем и со примарната инфраструктура и со секундарната. Недостигот од примарна инфраструктура значи дека немаме соодветни патишта што ќе водат до туристичките центри, а во нив нема паркиралишта. Секундарната инфраструктура, освен хотелите, ги опфаќа жичниците, гондолите без кои не може“, вели Сулев.
Италијанска компанија вложува 180 милиони евра на Шапка
Владата пред еден месец го одобри проектот на италијанската „Техно Алпи“, која планира Попова Шапка да ја направи атрактивен туристички центар.
Првата фаза на реализација на планот треба да почне годинава. Според бизнис-планот, таа ќе трае до 2028 година и во тој период на Шапка треба да влезат околу 55 милиони евра.
„Хотелот ’Попова Шапка’ ќе биде урнат, хотелот ’Славија’ ќе биде реновиран. Ќе бидат изградени четири нови хотели со четири ѕвездички. Планирана е изградба на вештачко езеро, затоа што се потребни резервоари со вода за да може да се прави снег што ќе помогне сезоната да трае од декември до март, а преку лето тоа може да се користи за летни атракции“, вели во изјава за „Блумберг Адрија“ директорот на ски-центарот „Попова Шапка“, Адем Авзију.
Презентација на проектот за развој на Попова Шапка
Адем Авзију, директор на ски-центарот „Попова Шапка“
Фокусот на инвеститорот, според Авзију, ќе бидат скијачките патеки. Планирани се 16 нови патеки, особено од страната на Јелак, каде што снегот трае подолго.
„Планирана е изградба на девет нови жичници, а на почетокот ќе се градат две. Освен тоа, инвеститорот планира и набавка на седум нови ратраци. Во бизнис-планот е наведено дека треба да бидат изградени и 15 километри патеки за крос-скијање“, објаснува Авзију.
Презентација на проектот за развој на Попова Шапка
И од државната Агенција за промоција на туризмот велат дека земјава има капацитет за развој на зимскиот туризам. Во изјава за „Блумберг Адрија“, директорот на Агенцијата, Љупчо Јаневски, неодамна рече дека за овој сегмент треба долгорочна стратегија.
„Инфраструктура, хотелски сместувачки капацитети, ски-лифтови и нови патеки за скијање се само дел од точките што треба да се подобрат. Сметам дека е потребно да се развиваат чекор по чекор и, со долгорочна стратегија, за десетина години да може да се зборува за повеќе од половина милион или милион ноќевања во текот на сезоната само на овие дестинации“, изјави Јаневски.
