Играта на македонската компанија „Фјуриос авокадо“ (Furious Avocado) достигна светска популарност по објавувањето во 2020 година и има над 150 милиони преземања.
За патот до развојот на успешна игра зборуваше Наум Михајловски, главен извршен директор на „Фјуриос авокадо“, нa телевизијата Блумберг Адрија.
„Патот почнува многу порано од самото издавање на играта. Играта баш денеска достигна 170 милиони симнувања. Иако личи на еден успех што се случи прекуноќ, не е баш така. Започнува со нашето професионално градење како основачи на студиото, пред повеќе од седум до десет години, за да можеме да дојдеме до момент кога имаме стручна подготвеност и познавање на светскиот пазар за развој на игри, за да создадеме свое студио и доволно конекции и да можеме да стапиме во партнерски договор со издавачи што се занимаваат со издавање игри“.
Во однос на развојот на индустријата на регионалниот пазар, Михајловски вели дека има огромно придвижување напред во поглед на бројот на студија што се занимаваат со развивање игри, но, за жал, Македонија е многу назад во тие трендови.
„Освен присуството на еден поголем издавач тука, кој има свои канцеларии каде што работат одреден број луѓе и неколку помали студија, како 'Фјуриос авокадо', кои оперираат на овој простор, може да се каже дека индустријата воопшто не се придвижува напред или се придвижува многу бавно. Проблемот би го лоцирал во недостигот од државна програма, првенствено кон создавање специјализиран кадар што би можел да се занимава со оваа работа. Досега не постои никаква државна стратегија за развој на вакви студија, но, од друга страна, не постојат и начини за образование специфично за потребите на оваа индустрија“, нагласи Михајловски.
.webp){kind=icon}
