На запад ништо ново. Точно, германскиот филм неделава триумфира на БАФТА, британскиот пандан на „оскар“, ама ова повеќе го пишувам за да ја опишам седмицата што изминува во земјава, а не поради филмот.
Иако Македонија е далеку од Запад. И поради лошите патишта и поради ниската конкурентност. Деновиве анализиравме зошто 57 километри автопат од Кичево до Охрид се гради десет години, но и што им недостига на домашните компании за да застанат рамо до рамо со западните. А, аналитичкиот тим на „Блумберг Адрија“ во својот последен извештај предупреди дека за зголемување на конкурентноста се потребни непопуларни одлуки.
Се занимаваме и со просечната плата за која Владата се пофали дека е уште едно исполнето предизборно ветување, и тоа предвреме. Надмина 34.000 денари. Она што владините претставници не го напишаа во своите статуси на социјалните мрежи е колкава е реалната вредност на зголемената просечна плата.
И овој пат се занимававме со растечките цени. Анализиравме како утринското задоволство стана луксуз и зошто кафето нема да поевтини и во наредниот период. Нашите аналитичари прогнозираа за кои е-трговци доаѓаат добри времиња. Пишувавме и зошто исти такви добри времиња не доаѓаат за сите оние работници што одлучиле да се преквалификуваат.
Денеска, на истекот од седмицата, в раце го имам вториот број на нашиот печатен магазин „Блумберг бизнисвик Адрија“ (содржините ќе можете да ги прочитате и тука). Полн е со интересни теми, кои ги засегаат сите земји во регионот, како таа за најголемите компании од петте земји што живеат подолго од 100 години. Преку сведоштвото на семејството Николовски од Скопје анализираме што се случи со пазарот на недвижности во регионот и како купувањето стан за просечните семејства стана невозможна мисија.
„Бизнисвик“ носи и глобални теми – дали е на повидок нова должничка криза и каква би била таа, со оглед на тоа што сега државите се во полоша финансиска состојба споредено со пред една деценија. Кој ќе пазари стартапи годинава и зошто тие бараат купувачи? Читаме за подготовката на законските рамки за токенизација. Трагаме по „балканските кучиња“ на војната на Путин, но анализираме и како доселување на Русите ја јакне српската економија.
За крај, на денешен ден лани нѐ разбуди веста за руската инвазија врз Украина. Во знак на поддршка на Украинците, а по повод грдата годишнина, неделава започна со историската посета на американскиот претседател Бајден на разурнатиот Киев. За време на прошетката со Зеленски се огласија и сирените за воздушен напад. „Вреди да се бориме онолку долго колку што е потребно. И толку ќе бидеме со вас, господине претседател. Колку што е потребно“, му рече Бајден на Зеленски.
Bloomberg
.webp){kind=icon}
