.webp){kind=icon}
По лебот, Владата ја замрзна цената и на тестенините и млекото и млечните производи. Премиерот Димитар Ковачевски денеска соопшти дека од понеделник шпагетите и макароните ќе поевтинат за 15 отсто, а млекото и млечните производи од следниот петок ќе се продаваат по цена 10 отсто пониска од сегашната. Одлуката за замрзнување на цените ќе важи до крајот на мај годинава.
„Се намалува продажната цена на тестенините, макароните и шпагетите, за 15 отсто или во просек за осум-девет денари. Се укинуваат и царинските давачки за увоз на овие продукти од 13 март до 31 мај 2023 година. Се замрзнуваат и цените на млечните производи: трајно кравјо млеко 2,8, 3,2 и 3,5 отсто, урда, кравјо и мешано бело сирење, кравји кашкавал, кисело млеко, павлака и јогурт. Цените се намалуваат за десет отсто, а одлуката важи од 17 март до 31 мај 2023 година“, изјави Ковачевски.
По одлуката за замрзнувањето на цените на млекото, „Блумберг Адрија“ побара став од најголемата млекарница во земјава – Битолска млекарница. Оттаму ни рекоа дека компанијата од декември наваму веќе ги намали цените на производите, свесни за намалувањето на куповната моќ на потрошувачите.
„Таргетирани во намалувањето беа најпродаваните производи на млекарницата за да се добие вистински ефект од поевтинувањето и производи што се во истите категории опфатени со денешните мерки од Владата. Како компанија секогаш ги почитуваме одлуките и препораките донесени од Владата, а покрај тоа нашиот главен интерес секогаш бил и ќе остане потрошувачот да има достапност до производи со врвен квалитет“, велат од Битолска млекарница за „Блумберг Адрија“.
За тоа како замрзнатите цени ќе се одразат на работата на компанијата, оттаму кратко ни одговорија дека ќе покаже времето.
„Во однос на мерката за замрзнување на цените и на млечните производи, времето ќе покаже како ќе се одрази врз целиот производствен процес, но ние веруваме дека ќе се најде балансот како да им се излезе во пресрет на потрошувачите, а истовремено да се обезбеди и одржливоста на домашната млечна индустрија“.
Владата веќе прави анализи за замрзнување на цените и на други производи. Министерот за економија Крешник Бектеши вели дека идната недела ќе се знае дали шеќерот, јајцата и оризот ќе се продаваат поевтино.
Според министерот, владата пристапи кон замрзнување на цените на основните прехранбени производи откако анализите на Секторот за трговија и на стопанските комори покажале дека повеќето компании ја користат максималната маржа и на некој начин се здружени за да не ги намалат своите профити.
„Во согласност со сите анализи на Секторот за трговија и коморите, се утврдува дека повеќето компании ја користат максималната маржа и на некој начин се здружени за да не ги намалат своите профити. Затоа одлучивме да одиме со замрзнување на цените. Остануваат уште шеќерот, јајцата и оризот, за кои наредната недела ќе се направат анализи и чии цени најверојатно ќе се замрзнат ако производителите не ги намалат“, изјави Бектеши.
Ова е втора одлука за замрзнување цени на прехранбени производи, откако на 28 февруари годинава стапи во сила ограничувањето на цената на белиот и полубелиот леб на 33 денари.
Во декември за производителите на храна Владата овозможи префрлање од слободен на регулиран пазар за снабдување со струја. Подоцна анализите покажале дека фирмите што користеле поевтина струја не ги намалиле цените соодветно. Затоа Владата прво ја укина евтината струја за компаниите, а потоа пристапи и кон замрзнување на цените.
