Народна банка: Годишен раст кај депозитите и кредитите

Вкупните депозити останаа непроменети во мај годинава, споредено со претходниот месец. Годишната промена е позитивна и изнесува 2,4 отсто, што целосно произлегува од зголемувањето на депозитите на секторот „домаќинства“, соопшти Народната банка.

Оттаму информираат дека вкупните кредити забележаа месечен раст од 0,8 отсто во текот на овој месец, при зголемено кредитирање кај двата сектора, со поголем придонес на секторот „домаќинства“. Годишната стапка на раст од 9,9 отсто е одраз на повисокото кредитирање кај двата сектора, кое е поизразено кај корпоративниот сектор.

„Во мај, вкупните депозити на корпоративниот сектор се зголемија за 0,1 отсто на месечно ниво, пред сè како резултат на зголемените депозитни пари, а во помала мера и на долгорочните депозити во денари, во услови на остварен пад кај останатите компоненти. Споредено со мај минатата година, вкупните депозити на корпоративниот сектор се пониски за 1,6 отсто, главно заради намалувањето на долгорочните депозити во странска валута, како и краткорочните и долгорочните депозити во денари, а во помал дел и заради депозитните пари, при забележан раст на краткорочните депозити во странска валута“, појаснуваат од Народната банка.

Кај кредитите на корпоративниот сектор, овој месец е забележан месечен и годишен раст од 0,5 отсто и 11,9 отсто, соодветно, поради растот на кредитите во денари и во странска валута, кој е поизразен кај кредитите во денари.

Депозитите на домаќинствата бележат раст од 0,2 отсто во мај во однос на претходниот месец.

„Растот во поголем дел се должи на зголемувањето на краткорочните депозити во странска валута, при дополнителен позитивен придонес и на депозитните пари и долгорочните депозити во странска валута, а во услови на пад кај денарските долгорочни и краткорочни депозити. Годишниот раст изнесува 4,5 отсто и пред сè се објаснува со зголемувањето на краткорочните депозити во странска валута, при помало позитивно влијание и на долгорочните депозити во странска валута и депозитните пари, во услови на пад кај денарските долгорочни и краткорочни депозити“, соопшти банката.

Овој месец, вкупните кредити на домаќинствата растат со стапка од 1,1 отсто, како резултат на зголеменото кредитирање во денари и во странска валута, малку поизразено во денари.

„Споредено на годишна основа, овие кредити бележат раст од 8 отсто и во поголем дел се должи на кредитите одобрени во денари“, велат од НБСМ.

Во мај годината, анализирано според намената на кредитите одобрени на физичките лица, потрошувачките и станбените кредити, како најзастапени категории, остварија месечен раст од 0,8 отсто и 1,2 отсто, соодветно, додека на годишно ниво се зголемени за 6,9 отсто и 15,8 отсто, соодветно. Во мај, автомобилските кредити бележат месечно и годишно намалување од 2,4 и 8,9 отсто, соодветно.

Кредитите одобрени на кредитни картички овој месец се зголемени за 0,7 отсто на месечна основа, додека на годишна основа тие се намалени за 2,2 отсто. Во мај, кај негативните салда на тековните сметки е забележан месечен и годишен раст од 2,1 отсто и 0,5 отсто. Кредитите одобрени врз други основи се пониски на месечно и годишно ниво за 1,9 и 34,4 отсто.

Во моментов нема коментари за веста. Биди прв да коментира...

Остави коментар