.webp){kind=icon}
Може ли да се очекува ладење на пазарот на недвижности и поголем пад на цените на становите?
Некои од домашните градежници се скептици дека во наредниот период би дошло до поголема корекција надолу во однос на цените на недвижностите.
Според Никола Велковски од Здружението на градежништво при Стопанската комора, причина се цените на дел од инпутите во производството, дефицитот од работна сила, но и големата побарувачка.
„Мислам дека ќе има некое смирување на цените, стагнација, но за намалување не сум сигурен. Цената на пример на бетонското железо е многу зголемена и тоа може да влијае во делот на изградба на карабините на објектите, а свесни сме сите во регионот за дефицитот од квалитетна работна рака, и тука цените на услугите на тие работници веќе се зголемени. Друг фактор е што градителите на овие објекти, особено во Македонија или Скопје, се практично еднократни инвеститори што инвестираат свои лични средства во градба. Тоа не се фирми што опстојуваат во градежништвото и им е секојдневна дејност, туку тоа се инвеститори што од случај во случај влегуваат во градба на објекти и тие добро сфатија дека овде е практично најдобриот профит, па не знам дали ќе бидат подготвени да ги попуштат цените по квадратен метар, затоа што тоа им оди во прилог и сè уште има и понуда и побарувачка од страна на купците. Може да има некое минимално стагнирање на цените, не знам колку ќе бидат попуштени, во внатрешноста на Македонија. Но во Скопје, особено во централното градско подрачје, во ударните општини како Карпош, Центар, Аеродром, Кисела Вода, мислам дека нема да се намалат цените. Можеби нема да има ни некое значително покачување, може да стагнираат, но да се намалат нема, затоа што и нема таква продукција веќе на понуда, а побарувачка сè уште има“, вели Велковски.
Најавите за изградба на станови од Акционерското друштво за изградба и стопанисување со станбен и деловен простор, според Велковски, нема многу да влијаат на цените во главниот град.
„Не знам колкава е продукцијата на тие станови. Колкав е тој број на станбени единици што може тие да го изградат и понудат на пазарот. Мислам дека тоа не е некоја значајна бројка, која може да влијае на редукција на цените во правец на намалување. Можеби во градовите надвор од Скопје, но во главниот град не е тоа некоја значајна бројка што може значајно да влијае на конкуренцијата... Особено затоа што тие станови, генерално, барем порано беа за одредена структура на граѓани, односно не беа за широка потрошувачка“, вели Велковски.
