Растат каматите на кредитите и на депозитите

Во април, просечната каматна стапка на вкупните кредити оствари месечно и годишно зголемување од 0,04 п.п. и 0,78 п.п., соодветно и изнесува 5,08 проценти. Просечната каматна стапка на вкупните депозити изнесува 1,17 проценти што претставува месечен и годишен раст од 0,06 п.п. и 0,49 п.п., соодветно, соопшти Народната банка.

„Просечната каматна стапка на новоодобрените кредити, во април, е зголемена на месечно и годишно ниво за 0,18 п.п. и 1,46 п.п., соодветно и изнесува 5,44проценти. Просечната каматна стапка на новопримените депозити изнесува 2,23 проценти и бележи месечен и годишен раст од 0,19 п.п. и 1,58 п.п., соодветно“, информираат од НБМ.

Какви се движењата на каматите за корпоративниот сектор?

Оттаму информираат дека просечната каматна стапка на вкупните кредити на корпоративниот сектор, во април, остварила месечно зголемување од 0,09 п.п. и изнесува 4,79 проценти.

„Притоа, растот е резултат на зголемувањето на сите компоненти, и тоа: каматните стапки на денарските кредити со валутна клаузула и на кредитите во странска валута (за 0,11 п.п., соодветно), како и на каматните стапки на денарските кредити без валутна клаузула (за 0,07 п.п.). Каматната стапка на вкупните кредити на корпоративниот сектор е повисока за 1,34 п.п. на годишна основа“, велат од Народната банка.

Во април, годинава каматната стапка на новоодобрените кредити на корпоративниот сектор забележала раст од 0,26 п.п. на месечна основа и изнесува 5,53 проценти.

„Месечната промена произлегува од растот на каматните стапки на кредитите во странска валута и на денарските кредити со валутна клаузула (за 0,76 п.п. и 0,45 п.п., соодветно), во услови кога каматните стапки на денарските кредити без валутна клаузула бележат намалување (за 0,11 п.п.). Анализирано на годишна основа, оваа каматна стапка е зголемена за 1,90 п.п.“, информираат од Народната банка.

Во април, просечната каматна стапка на вкупните депозити на корпоративниот сектор изнесува 1,82 проценти, што претставува месечно зголемување од 0,08 п.п. Анализирано по валута, растот се должи на повисоките каматни стапки на депозитите во странска валута и на денарските депозити со валутна клаузула (за 0,25 п.п. и 0,17 п.п., соодветно), при остварен раст и на каматните стапки на денарските депозити без валутна клаузула (за 0,01 п.п.). Каматната стапка на вкупните депозити на корпоративниот сектор е повисока за 0,99 п.п. во споредба со април 2022 година.

„Каматната стапка на новопримените депозити на корпоративниот сектор, во април, се зголеми за 0,52 п.п. во однос на претходниот месец и изнесува 1,62 проценти. Нагорната промена е резултат на растот на сите компоненти: каматните стапки на депозитите во странска валута (за 1,60 п.п.) и каматните стапки на денарските депозити со и без валутна клаузула (за 1,24 п.п. и 0,13 п.п., соодветно). Споредено на годишна основа, оваа каматна стапка бележи раст од 1,10 п.п.“, велат од Народната банка. 

Раст на каматите кај новоодбрените кредити за населението 

Во април, каматната стапка на вкупните кредити на домаќинствата е непроменета во однос на претходниот месец и изнесува 5,34 проценти. Во споредба со април минатата година, оваа каматната стапка бележи годишен раст од 0,25 п.п. 

„Просечната каматна стапка на новоодобрените кредити на домаќинствата, овој месец, забележа месечно зголемување од 0,03 п.п. и изнесува 5,26 проценти. Притоа, растот произлегува од зголемувањето на каматните стапки на кредитите во странска валута и на денарските кредити со валутна клаузула (за 0,40 п.п. и 0,05 п.п., соодветно), во услови на пад на каматните стапки на денарските кредити без валутна клаузула (за 0,07 п.п.). На годишно ниво, оваа каматна стапка е повисока за 0,75 п.п.“, велат од банката. 

Во април, каматната стапка на вкупните депозити на домаќинствата остварила месечен раст од 0,07 п.п. и изнесува 1,11 проценти. Нагорната промена се објаснува со зголемувањето на сите компоненти: каматните стапки на денарските депозити без валутна клаузула и на каматните стапки на депозитите во странска валута (за 0,08п.п. и 0,05 п.п., соодветно), при раст и на каматните стапки на денарските депозити со валутна клаузула (за 0,01 п.п.). Каматната стапка на вкупните депозити на домаќинствата е зголемена за 0,44 п.п. во однос на истиот месец минатата година.

„Каматната стапка на новопримените депозити на домаќинствата, во април, бележи зголемување од 0,07 п.п. на месечна основа и изнесува 2,34 проценти. Притоа, промената во целост се должи на повисоките каматни стапки на денарските депозити без валутна клаузула и на депозитите во странска валута (за 0,02 п.п., соодветно). Овој месец, кај банките и штедилниците не се евидентирани новопримени денарски депозити со валутна клаузула. Споредено на годишно ниво, каматната стапка на новопримените депозити на домаќинствата оствари раст од 1,65 п.п.“, велат од НБМ. 

Во моментов нема коментари за веста. Биди прв да коментира...

Остави коментар