Трошоците на животот во мај 2023 година се зголемиле за 11,3 проценти во однос на истиот месец минатата година, а цените на мало оствариле раст од 7,5 проценти, покажуваат новите податоци на Државниот завод за статистика.
Трошоците на животот во мај 2023 година, во споредба со претходниот месец се зголемиле за 0,4 проценти, а цените на мало се намалиле за 0,9 проценти. Иако стапката на инфлација забавува, статистиката открива дека повеќе производи и услуги се‘ уште поскапуваат.
Имено, пораст на трошоците на животот во мај 2023 година, во споредба со претходниот месец, е забележан кај свежиот и разладениот зеленчук, освен компирите и другите коренести плодови за 13,3 проценти, свежото и разладеното овошје за 8,5 проценти, прехранбените производи, неспоменати на друго место за 2 проценти, рибата и морските плодови за 1,6 проценти, жестоките пијалаци за 0,8 проценти. Исто така, зголемување имало и кај сирењето и урдата (0,5 проценти), месото за (0,4 проценти), кафето, чајот, какаото, минералната вода, газираните пијалаци, соковите од овошје и зеленчук, виното (0,3 проценти), како и кај шеќерот, џемот, медот, чоколадата и кондиторските производи, пивото за 0,2 проценти.
Во мај, исто така, пораст на трошоците на животот е забележан и кај другите услуги неспоменати на друго место (10,6 проценти), накитот, часовниците и рачните часовници (4,9 проценти), медицинските услуги (3,4 проценти), парамедицинските услуги, обувките, услугите за сместување, фармацевтските производи, туристичките аранжмани и други производи и услуги.
Намалување на трошоците на животот во мај 2023 година, во споредба со претходниот месец, е забележано кај маслото и маснотиите за 2,4 проценти, млекото за 1,6 проценти и лебот и житата за 0,7 проценти. Исто така, намалување на трошоците на животот е забележано и кај воздухопловниот патнички транспорт за 27,2 проценти, течните горива за домаќинствата за 7,3 проценти, горивата и мазивата за сопствените превозни средства за 5,5 проценти, гасот за домаќинствата за 4,3 проценти и кај уште неколку други производи и услуги.
.webp){kind=icon}
