.webp){kind=icon}
Доколку делницата Подмоље - Охрид не биде готова до јули, како што вети министерот за транспорт и врски Благој Бочварски, тогаш некој ќе мора да преземе одговорност, вели во интервју за „Блумберг Адрија“ Крсто Блажески, претседател на ХОТАМ.
„Ќе биде личен товар на министерот за транспорт и врски ако не се исполни ветувањето. Граѓаните зависат од една ваква туристичка сезона, која е во подем и треба да го зголеми бројот на ноќевања и да се извади нешто од оваа сезона за да се преживее цела година. Не може во екот на сезоната да се затвора една таква делница, т.е. влезот на Охрид како најголема туристичка дестинација во Македонија“, вели Блажески.
Иако временските услови во последниот месец не беа на страната на хотелиерите, бројот на гостите не е намален и очигледно тоа е добар знак, смета Блажески, кој додава дека очекува да има зголемување на барањата за сместување по должината на охридско-струшката ривиера.
„Очекуваме дека ќе има некој период откај 15-20 јули докај 10 август да биде пребукирано и да се снаоѓаме како што знаеме за да ги угостиме и сместиме нашите гости“, вели Блажески.
Сепак потенцира дека поголемите пречки се инфраструктурата на, како што вели, историската градба на автопатот од Кичево до Охрид и големите доцнења, речиси десетта година.
„И сега, во овој момент, се работи на клучката пред Охрид. Патот од Подмоље кон Охрид е затворен и се оди кон еден спореден пат, еден помал регионален пат што треба да прими сообраќај од секаков тип возила, односно автобуси, камиони, автомобили, а за почеток на сезоната има нервоза кај гостите и очекуваме дека сето тоа ќе се заврши до 10 јули“, вели Блажески.
Тој додава дека очекува новите авиолинии да обезбедат и поголем број туристи, но вели дека за Охрид очекува да се обезбедат дополнителни авиолинии, бидејќи инфраструктурата на патот е многу тешка.
Секако, она што е дополнителен проблем, освен инфраструктурата, е работната сила. Сепак, сега се ангажираат и млади од 16-17 години, кои работат со помош од поискусните. Состојбата е критична, но туристичкиот сектор вели дека се снаоѓа, во еден дел со зголемени плати на вработените, кои пак влијаат и на цените на угостителските услуги. Сепак, според Блажески, охридско-струшката ривиера и натаму има најниски цени во регионот.
