Покрај злоупотребите од одредени инвеститори што ги пумпаа цените, притисок врз растот на цените вршат и сопствениците на половни станови, вели меѓу другото во интервју за „Блумберг Адрија“ претседателот на Градежната комора, Ивица Јакимовски, одговарајќи на прашањето зошто Македонија е европски рекордер по растот на цените на становите.
„Имаме и одредена злоупотреба од помала група инвеститори, каде што има неконтролирано зголемување на цените. Ако направиме добра анализа што се случува всушност во делот на инвестиции каде што има поголемо производство на недвижности, таму имаме реални цени, цени што се адекватни на тоа што се нуди. Тој тренд што се случи кај нас, како што најавивте и вие дека сме рекордери во делот на покачувањето на цените, е всушност појава на повеќе фактори што влијаеја во одреден временски период, како недоволната понуда на локации. Тоа што се случи во 2022 година – нагло покачување на градежните материјали, паралелно на тоа услугата во градежниот сектор се зголеми неколкупати, не разговараме процентуално, туку за неколкупати, доведе до одреден притисок и страв кај некои инвеститори што имаат ставено одредена резерва... Голем притисок е создаден и во делот на половните станови, каде што сопственоста е на физички лица што вршат притисок на пазарот. Притисокот што се создаде кај нас повеќе е наметнат во делот на половните станови“, вели Јакимовски.
Јакимовски посочува дека драстичен пад на цените не може да се очекува, особено во поголемите градови, каде што побарувачката е поголема, а локации за градба има сè помалку.
Сепак, тој очекува трендот на стабилизација на цените да продолжи.
„Мене искрено ме радува тоа што во вториот квартал од 2023 година веќе имаме стабилизација и убеден сум дека тој тренд ќе продолжи и во третиот и четвртиот квартал од годинава и дека ќе имаме корекција таму каде што цените се зголемени повеќе отколку што реално пазарот дозволува. Мојот став е дека ќе дојдеме до одредена стабилизација, каде што ќе нема можност за нагли зголемувања од една страна, а од друга страна не може да се очекува голема корекција на цените во целина. Но кај одредени случи ќе има корекција, онаму каде што цените се енормно зголемени“, вели Јакимовски.
.webp){kind=icon}
