Раст на депозитите и на кредитите во јуни

Вкупните депозити во јуни остварија месечен и годишен раст од 1,2 и 11,5 проценти којшто произлегува од зголемувањето на депозитите на двата сектора, со поголем придонес на секторот „домаќинства“, соопшти Народната банка. Оттаму информираат дека кај вкупните кредити е забележано месечно зголемување од 1,1 процент под влијание на растот на кредитирањето кај двата сектора, со поголем придонес на корпоративниот сектор. 

„Годишната стапка на раст од 6,5 проценти е одраз на повисокото кредитирање кај двата сектора, коешто е малку поизразено кај секторот „домаќинства““, велат од Народната банка.

Во јуни, вкупните депозити на корпоративниот сектор, бележат раст од 1,3 проценти во споредба со претходниот месец. 

„Нагорната промена се должи на зголемувањето на краткорочните и долгорочните депозити во денари, при дополнителен позитивен придонес и на депозитните пари и краткорочните депозити во странска валута, додека долгорочните депозити во странска валута забележаа пад. На годишна основа, депозитите на корпоративниот сектор остварија зголемување од 19,7 проценти, коешто произлегува од растот на сите компоненти, со најголем придонес на депозитните пари и краткорочните депозити во странска валута“, информираат од Народната банка

Од централната банка велат дека кредитите на корпоративниот сектор овој месец, забележаа месечен раст од 1,2 проценти, којшто се должи на повисоките кредити одобрени во денари и во странска валута, со поголем придонес на денарските кредити.

„Во споредба со јуни претходната година, кредитите на корпоративниот сектор се зголемени за 6,5 проценти како резултат на повисокото кредитирање во денари и во странска валута, поизразено кај кредитите одобрени во странска валута“, објаснуват од НБМ.

Депозитите на домаќинствата во јуни се зголемени за 1,2 проценти на месечна основа во најголем дел под влијание на растот на депозитните пари и долгорочните депозити во странска валута и во денари, при помало зголемување и на краткорочните депозити во денари, додека краткорочните депозити во странска валута забележаа пад. 

„Годишната стапка на раст од 8,8 проценти целосно произлегува од зголемувањето на депозитните пари и долгорочните депозити во странска валута и во денари, во услови на забележан пад на краткорочните депозити“, велат од Народната банка.

Кредитите на домаќинствата, во јуни, бележат нагорна месечна и годишна промена од 0,9 и 6,4 проценти, соодветно. 

„Анализирано според валутната структура, растот на месечна и на годишна основа се должи на повисоките кредити во денари и во странска валута, со поголем придонес на кредитите во странска валута“, укажуваат од централната банка.

Според намената на кредитите одобрени на физичките лица, во јуни, кај најзастапените категории ‒ потрошувачките и станбените кредити е забележан месечен раст од 1,1 и 1,4 проценти, соодветно, додека на годишна основа се повисоки за 6,2 и 11,3 проценти, соодветно.

„Овој месец, автомобилските кредити остварија месечно и годишно зголемување од 4,4 и 8,6 проценти, соодветно, додека кредитите одобрени на кредитни картички бележат намалување на месечно и на годишно ниво од 0,1 и 1,3 проценти, соодветно. Во јуни, кај негативните салда на тековните сметки и кај кредитите одобрени врз други основи е забележан месечен пад од 4,1 и 4,2 проценти, соодветно, при годишно намалување од 2,6 и 17,9 проценти, соодветно“, велат од Народната банка. 

Во моментов нема коментари за веста. Биди прв да коментира...

Остави коментар