За поголем економски развој клучен е женскиот лидерски потенцијал

Поголемото учество на жените на лидерски позиции поттикнува развој и носи просперитет во секое општество. Ова го истакнаа учесничките на настанот што се одржа под мотото „Заедно успешни – ослободување на женскиот лидерски потенцијал“, а го организираа „АХК Северна Македонија“, Македонско-Германското стопанско здружение и „ЕОС Матрикс“ (EOS Matrix).

„Се залагаме за јакнење на женското лидерство во економијата, воедно градиме и мрежа каде жените од деловниот свет можат да разменат лични искуства, да ги споделат предизвиците со кои се соочуваат на менаџерските позиции, да учат едни од други и да си бидат поддршка. Со споделување на конкретни искуства на успешни жени менаџерки сакаме да ги охрабриме и мотивираме идните генерации да се стремат кон успех и лидерски позиции во компаниите“, истакна Антје Ванделт, директорка на „АХК Северна Македонија“.

Блумберг Адрија

Настанот се одржа во просториите на „ЕОС Матрикс“ во Скопје, а пред присутните претставници на бизнис заедницата се обрати и генералната директорка на компанијата, Катерина Бошевска.

„Современите општества се темелат на принципот на еднаквост, но сепак, само 10 проценти од компаниите на „Форчн 500” (Fortune 500) се предводени од жени. Затоа треба да работиме да се примени целосно овој принцип и затоа важно е да се работи на зајакнување на женскиот лидерски потенцијал во сите сфери во општеството“, рече Бошевска.

Таа додаде дека децениски студии покажуваат дека жените лидери помагаат да се зголеми продуктивноста, да се подобри правичноста и функционираат како повеќе трансформативни лидери од мажите.

„Тие го инспирираат својот тим, го тренираат својот тим, ја нагласуваат тимската работа и автентичната комуникација како клуч за успехот. Затоа е важно да го градиме лидерскиот потенцијал кај младите жени“, истакна Бошевска.

 

 

 

Во моментов нема коментари за веста. Биди прв да коментира...

Остави коментар