Усвоен данокот на солидарност, Комората ќе го оспори на Уставен суд

За Стопанска комора, носењето на Законот за данок на солидарност не претставува никакво усогласување со директивите и регулативата на ЕУ, напротив тоа е само злоупотреба на тие регулативи, соопштија денеска оттаму. Велат дека законот ќе го оспорат на Уставен суд, а нивната реакција следува откако Собранието го усвои законот на денешната седница. 

Од Комората велат дека имаат агрументи против законот за кои веќе зборувале. Според бизнисмените, овој закон има селективен пристап затоа што се опфатени само поголемите компании (со приход поголем од 615.000.000 денари. Тврдат дека се врши оданочување на сите компании, независно дали добивката што ја оствариле се должи на пазарните услови (остварена екстра добивка поради движења на пазарите на енергенси или други причини кои довеле до конјуктурни поместувања на пазарот) или се должи на раст на добивката на компаниите како резултат на нивното работење, односно како резултат на зголемени инвестиции, подобрена продуктивност, освојување на нови пазари и сл.). Од Стопанската комора велат и дека се дестимулираат успешните компании, кои се инвестициски ориентирани. „Ваков данок, кој се носи ад хок, го нарушува начелото на почитување на правото и создава несигурност кај постојните и потенцијалните инвеститори, особено ако се има предвид дека соседните држави немаат воведено сличен данок, велат оттаму.

„Носењето непредвидливи закони од ваков вид и други мерки, поттикнува се повеќе компании од Македонија во странска сопственост да се премислуваат и да го префрлат своето седиште во некоја од соседните земји кои не носат вакви закони и мерки (пред се во Србија, па и Косово), што преставува ризик од губење на редовни приходи, даноци и сл. во буџетот кои сега се плаќаат, сметаат бизнисмените здружени во Стопанската комора.

Пред покренување на иницијативата, Комората ќе побара од Претседателот да не го потпише Указот за прогласување на Законот за данок на солидарност, затоа што според нив, тој е во спротивност со член 52 од Уставот,  но велат дека не очекуваат барањето на бизнис секторот да биде прифатено.

 

Во моментов нема коментари за веста. Биди прв да коментира...

Остави коментар