Комората со допис до властите бара повлекување на солидарниот данок

Стопанската комора на Северна Македонија преку Клубот 100, со допис испратен до претседателот на Собранието, претседателот на Владата и до министерот за финансии, во кој се образложени низа аргументи, бара запирање на постапката за донесување на предложениот закон за данок на солидарност по итна постапка со европско знаменце. Во дописот испратен од страна на Стопанската комора се укажува на сите негативни последици од ваквото евентуално законско решение чија ретроактивна примена за фискалната 2022 година ќе ги предизвика врз домашните и странските компании и инвеститори во државата.

„Оваа иницијатива беше поддржана и од Советот на странски инвеститори, при што особено беше укажано дека повлекувањето на овој предлог-закон од редовната собраниска процедура и неговото повторно пуштање со наводно европско знаменце ќе претставува само обид за манипулирање со редовните собраниски процедури за носење на законите и злоупотреба на европското знаме“, се наведува во дописот

Според Комората, носењето на законот не претставува никакво усогласување со директивите и регулативата на ЕУ, напротив, тоа е само злоупотреба на тие регулативи.

„Можни се две причини зошто Владата, во најблага смисла на зборот, не ја кажува вистината и ја злоупотребува регулативата на ЕУ. Првата е дека воопшто не ја разбираат Регулативата 2022/1854, а тогаш тешко нам ако ваква администрација треба да нè усогласува со европското законодавство во целиот процес на преговори со ЕУ до постигнување полноправно членство. Втората, која е уште полоша, е дека администрацијата можеби правилно ја чита Регулативата 2022/1854, но свесно изнесува неточни податоци и сега ќе се обиде, користејќи ја скратената постапка, да ги убеди пратениците да го донесат предложениот закон за данокот на солидарност.“

Овој закон ќе предизвика негативно влијание врз бизнис-секторот во земјата, па од Комората апелираат до Владата наместо носење неуставни закони, да се позанимаваат со буџетските трошења.

„Крајно време е оваа и идните влади и собранија на Република Северна Македонија (како што не направија речиси ниту една од минатите влади и собранија) да почнат да се занимаваат со енормниот пораст на буџетската потрошувачка и со политики и мерки што ќе доведат до нејзино намалување, а не да измислуваат вакви неуставни закони“.

Стопанската комора најави иницијатива што ќе ја поднесе пред Уставниот суд за преиспитување на уставноста на законот. Доколку пратениците го усвојат законот, Комората ќе бара од претседателот на државата да не го потпишува указот за прогласување на законот за данок на солидарност, затоа што тој, според нив, е во спротивност со членот 52 од Уставот.

 

 

 

 

 

 

Во моментов нема коментари за веста. Биди прв да коментира...

Остави коментар