Државата треба да им врати на компаниите 50 милиони евра

Државата ќе треба да им врати на компаниите близу 50 милиони евра откако Уставниот суд донесе одлука за поништување на Законот за солидарен данок.

Компаниите платија солидарен данок во текот на 2023 година за добивките што ги остварија во текот на 2022 година, во екот на енергетската криза. Оваа еднократна вонредна јавна давачка ја платија 156 компании.

Компаниите што беа оданочени со солидарен данок во текот на 2022 година имаа вкупен приход поголем од 615 милиони денари (околу 10 милиони евра). Целта беше да се соберат средства за ублажување на последиците од кризата и да се придонесе за јавните расходи на солидарен начин.

Уставниот суд при носењето на одлуката постапуваше по иницијативата што ја поднесоа „Финмак“ од Скопје, Стопанската комора на Република Северна Македонија, „ЕТМТ Енерџи“, Стопанската комора на Северозападна Македонија и друштвото за консалтинг „Лански, Ганзгер, Зеќири + партнер“.

Судот во ноември минатата година изрази сомнеж дека оспорениот закон ги повредува темелната вредност владеење на правото уредена со членот 8 став 1 алинеја 3 од Уставот и фундаменталните принципи на кои почива, како што се правната сигурност на субјектите во нивната правна положба, правната предвидливост и правната извесност во легитимните очекувања на субјектите во правото.

Во расправата уставните судии изразија сомнеж дека станува збор за закон што произведува повратно дејство, што е во спротивност со членот 52 од Уставот.

„Судот го имаше предвид фактот дека ретроактивноста и нејзиниот исклучок се дозволени само кога станува збор за тековни постапки, но во случајот засегнатите субјекти ги окончале односите со плаќањето на данок во 2022 година. Судот во оваа фаза оценува дека со донесувањето  таков вид данок компаниите се ставени во нееднаква положба и дека законодавецот направил упад во уставно загарантираното право на сопственост, како и упад во слободата на пазарот и претприемаштвото“, констатира Уставниот суд.

Претходно премиерот Христијан Мицкоски изјави дека одлуките на Уставниот суд не се коментираат, туку се спроведуваат и ако судот донесе одлука да се вратат 50-те милиони евра од солидарниот данок, тие ќе бидат вратени.

Во моментов нема коментари за веста. Биди прв да коментира...

Остави коментар