Осум компании се соочуваат со присилна наплата на солидарен данок, изјави Сања Лукаревска, директорка на УЈП, во интервју за „Блумберг Адрија“.
Лукаревска посочува дека обврска да платат солидарен данок имале 156 компании.
„Останаа уште осум компании што имаат блокирани сметки, за кои се преземени одредени дејства на присилна наплата“, вели Лукаревска.
Таа додава дека од 148 компании што го платиле овој еднократен данок во буџетот има слеано 2,6 милијарди денари.
„Меѓутоа и со овие осум компании што всушност немаат направено уплата сме во постојана комуникација. Истите тие прашуваа кои се можностите за да платат до крајот на годинава“, додава Лукаревска.
Меѓу тие што не платиле има две јавни претпријатија, а преостанатите се од различни сектори, не станува збор за големи даночни обврзници, туку станува збор за средни даночни обврзници.
Наплатата на даноците успешна
Лукаревска посочува дека во ноември има задоволителна наплата на даноците.
„Иако изминатите месеци имаме одреден пад кај ДДВ затоа што го сменивме режимот на оданочување во согласност со условите што ни беа тогаш наметнати преку соодветна одлука во периодот на енергетската криза, сето тоа се рефлектираше на приходната страна од ДДВ“, вели Лукаревска.
Таа додава дека од почетокот на годината досега е остварен вкупен даночен приход од 102 милијарди денари, што е за 11,76 отсто повисоко во однос на планот и повисоко за 7,62 отсто од остварениот даночен приход за истиот период лани. „Во ноември е наплатен износ од 10 милијарди денари, што значи дека истиот тој е за 42,55 отсто повисок во однос на лани, каде што наплатениот износ бил 7 милијарди денари“, заклучува Лукаревска.