Во академската 2022/2023 година во Македонија, најголем број студенти или 77,7 отсто се запишале на државните високообразовни установи, додека 22,3 отсто се запишале на приватните високообразовни установи. Во оваа академска година се запишале вкупно 53.821 студент, што претставува зголемување за 4,2 отсто во однос на академската 2021/2022 година. На прва година студии, во оваа академска година, се запишале 15.097 студенти при што тука се опфатени и студентите што запишуваат прва година по втор, трет и повеќепати.
На државните универзитети во Македонија студираат околу 80 отсто од сите активни студенти, додека остатокот отпаѓа на приватните универзитети, вели Предраг Трпески, декан на Економскиот факултет при УКИМ во интервју за „Блумберг Адрија“.
„Приватните факултети се многу повеќе на број, од само пет државни универзитети кои пак зафаќаат 80 отсто од активните студенти во државата. Половината од нив студираат на најголемиот, најстариот и би рекол најреномираниот универзитет во земјата, а тоа e Универзитетот 'Кирил и Методиј' во Скопје“, вели Трпески.
Овие бројки пак јасно кажуваат дека државните универзитети имаат една доминантна позиција, смета тој.
„Би сакал да истакнам дека нема намалување на интересот за студирање на државните универзитети. Напротив, државните универзитети, конкретно УКИМ, Економскиот факултет - Скопје перманентно ја засилуваат својата позиција во високо образовниот простор. Економскиот факултет Скопје е пример каде што последните неколку години, иако имајќи ги предвид негативните трендови во земјата како што се намалување на бројот на средношколци, сепак факултетот има еден ппостојан тренд на зголемување на бројот на студенти кои што се запишуваат во прва студиска година. Самото тоа кажува дека Економскиот факултет - Скопје не само што има намера да ја задржи позицијата во високообразовниот простор на Македонија туку и да ја засили во наредниот период“, вели Трпески.
Тој не гледа конкуренција во приватните универзитети.
„Самиот податок дека околу 80 отсто од средношколците се одлучиле да студираат на државните универзитети кажува дека тие избрале квалитет. Квалитетот на високообразовните државни институции пред сè се согледува во концепирање на наставните програми“, вели Трпески.
Тој дополнува дека седумте студиски програми на Економскиот факултет - Скопје се усогласени со студиските програми на реномирани универзитети кои се рангирани помеѓу 50-те универзитети на Шангајската листа.
Дополнително, вели Трпески, има соработка со бизнис заедницата.
„Тоа овозможува подобар настап на пазарот на трудот и наоѓање на брзо вработување. Соработката со приватниот и јавниот сектор е еден од нашите столбови, една од нашите стратешки цели за развивање“, вели Трпески, и додава дека имаат меморандуми, договори за соработка со најмоќните компании од сите дејности во државата и тоа во повеќе насоки.
„Прво на нашите студенти со тие меморандуми за соработка им овозможуваме пристап до компании, да може да изведуваат практична настава и на тој начин компаниите ги носиме кај нас да почнат да регрутираат студенти уште во текот и студирањето. Голем број од менаџментот на тие компании ги каниме да дојдат на нашите предавања и тие вршат практично настава за нашите студенти“, вели Трпески.
Дополнува дека се работи и на подобрување на меѓународната позиција на Економскиот факултет.