.webp){kind=icon}
По патот на дигитализацијата секогаш ќе се чувствуваме како да сме чекор назад, но компаниите мора да се адаптираат на новите трендови и технологии за да ги намалат своите трошоци и да ја зголемат продуктивноста, вели во интервју за „Блумберг Адрија“ извршниот директор на „Киншифт“, Лудовик Гауде.
Со него зборувавме и за можноста за ширење на капацитетите на компанијата на македонскиот пазар и во регионот Адрија, која е стратегијата на компанијата со нејзините аквизиции, меѓу кои беше и онаа на компанијата „Сеавус“, какви вештини бараат на пазарот и какви промени ќе донесат новите технологии и развојот на вештачката интелигенција...
„Киншифт“ има широк опсег на работа, од софтверски решенија до консултантски услуги, како и широк опсег на услуги за компаниите од телекомуникацискиот, медиумскиот и технолошкиот сектор. Со оглед на изминатите неколку години во кои бевме соочени со економска криза, раст на каматите, геополитичките тензии, што би издвоиле како најголем предизвик за Вашата компанија?
Лудовик Гауде
Bloomberg Adria
За „Киншифт“ најголемиот предизвик беше да ги интегрираме сите компании што ги купивме, а само во последниве четири години купивме шест компании. Овде, во Македонија, „Сеавус“ беше нашата прва меѓународна аквизиција. Нашата најголема задача беше да ги интегрираме сите тие различни компании, кои имаат различна експертиза и различна историја, во една компанија. И, секако, да се приспособиме на пазарните промени, кои самите ги спомнавте.
Извршивте неколку аквизиции во последните години. Каква е стратегијата зад тоа?
Нашата инвестициска теза, нашата инвестициска хипотеза во основа е двојна. Како прво, повеќе од очигледно е дека има нарушувања на пазарот, сите влегуваат во светот на дигитализацијата, започната е транзицијата и некој мора да ги поддржи компаниите што транзитираат. Но втората хипотеза е дека повеќето компании, повеќето услужни компании што извлекуваат вредност од оваа трансформација се всушност надвор од нашиот регион. И сфативме дека постои инвестициска можност за нас да ги консолидираме сите локални играчи на Балканот, во овој регион, но и во Источна Европа и во Западна Европа и да создадеме регионален европски, поголема европска компанија за развој на софтвер. Ние веруваме во тоа и затоа инвестираме во оваа теза.
Која е главната улога на македонскиот разгранок на „Киншифт“, кој практично ги покрива и Србија и Босна и Херцеговина? Како функционира таа интеграција на компаниите со оглед на разликите меѓу земјите? Кои се придобивките, а кои се недостатоците?
Па, првата придобивка е тоа што е одличен регион. Секогаш уживам да доаѓам овде, има одлично чувство за гостопримство, а тука има и многу талентирани луѓе. Кога ќе ги собереме тие различни региони во Европа, всушност имаме пристап до талентирани поединци во Македонија, БиХ и Србија. Ние сме во бизнис што ги развива тие таленти и сакаме да ги направиме тие таленти достапни и на други пазари. И тоа функционира одлично за нас. Задоволни сме со соработката. Гледаме многу страсни поединци и, на крајот, како компанија се фокусираме на ресурсот што е неограничен. Тоа се креативноста, страста и влијанието што ги имаат луѓето, а сето тоа го наоѓаме овде.
Каков кадар работи во Вашата компанија во Македонија и дали има капацитет за понатамошен развој на Вашата компанија на нашиот пазар?
Во Македонија, Србија и БиХ имаме главно технички тимови, кои во основа дизајнираат и градат дигитални решенија за нашите клиенти. Значи, од Западна Европа или од Источна Европа вадиме одредени проекти на кои работиме со нашите клиенти и ги носиме овде, ги развиваме и градиме архитектура овде во регионот. Тоа е нашата главна активност. Значи, ние сме всушност центар за истражување и развој за нашите клиенти.
Лудовик Гауде во „Лидери“ со Ирена Каревска Стефановска
Bloomberg Adria
Дали македонскиот пазар има капацитет за понатамошен развој на Вашата компанија и на слични компании?
Да, гледаме многу можности за развој. Се разбира, ние самите го стимулираме тој раст. Значи, имаме свој образовен центар, каде што секој има можност за едукација, да ги развие своите вештини во ИТ-сферата. Ние ја користиме оваа можност да вработиме луѓе од оваа Академија или, секако, тие се слободни да изберат некој друг пат ако го сакаат тоа. Ние ги препознаваме можностите и темелно ги испитуваме. На овој пазар сме веќе подолго време, па знаеме како да функционираме и, како што напоменав, многу ни се допаѓа и од професионална и од лична страна. Па така, за нас е лесен изборот да продолжиме да се развиваме во регионот Адрија.
Какви вештини барате од вработените?
Две. Прво, се разбира, тоа се технички вештини. Луѓе што поминале низ процес или имале повеќе искуства во решавање проблеми што досега не биле решени. Но исто така поединци што се човечки ориентирани кон технологијата. Ние не развиваме технологија што бара проблем за решавање, туку гледаме поинаку на тоа. Гледаме каков точно е проблемот пред нас, за што станува збор, а најчесто проблемот е од човечка природа, и користиме технологија за да најдеме решение за тој конкретен предизвик.
Ја споменавте технологијата… Какви се Вашите очекувања за развојот на новите технологии и влијанието на вештачката интелигенција? И какви иновации имате во Вашиот план за развој, каде се насочувате?
Се разбира, вештачката интелигенција (ВИ) е многу актуелна. Начинот на кој ние гледаме на ВИ е дека таа ќе создаде можност да се отстранат некои од монотоните задачи, не само за ИТ-програмерите туку и во другите индустрии. И затоа многу е важно за нас да бидеме комплементарни со вештачката интелигенција. Да ѝ дозволиме на оваа дополнителна интелигенција да ги врши задачите што се повторувачки, а ние луѓето да се фокусираме на нешто што е порелевантно и повлијателно, а тоа е креативноста. А обично креативноста се наоѓа кога сте во група, комуницирате и сте социјално активни. И ВИ ќе ни даде можност да поминуваме повеќе време со нашите колеги и, секако, со нашите семејства.
Како вештачката интелигенција ќе го промени пазарот на трудот, особено ИТ-индустријата?
Па, во суштина, станува збор за наоѓање комплементарност со ВИ. Често програмерите голем дел од своето време трошат на развивање и обновување на нешто што е веќе правено во минатото. А со ВИ програмерите и дизајнерите ќе можат да го забрзаат својот развој и да бидат покреативни за да го премостат тој јаз помеѓу технологијата и човекот и да се осигуриме дека ќе поминуваме повеќе време во користење на технологијата за решавање на човечките проблеми, а не само да ја развиваме технологијата сама по себе.
A што е со ризиците? Кои се главните предизвици во имплементацијата на вештачката интелигенција?
Еден од главните ризици во дигитализацијата воопшто, а вештачката интелигенција е дел од тоа, е заканата за сајбер-безбедноста. Вештачката интелигенција дава одличен начин за развој и забрзување на дигиталната трансформација, но исто така претставува и ризик, а тоа е веројатно нешто на што сите ние ќе треба да обрнеме внимание и да бидеме заштитнички настроени кон тоа. Ние ги насочуваме нашите клиенти и програмери секогаш да развиваат вештини, технологии и решенија што се безбедни, така што луѓето ќе можат да уживаат во придобивките од технологијата, минимизирајќи ги потенцијалните ризици.
Колку брзо бизнис-светот се приспособува на процесот на дигитална трансформација? Кои се главните пречки на тој пат за компаниите?
Темпото на промени секогаш е проблем. Ние решаваме проблеми со одредена технологија, а подоцна се појавува нешто друго или се среќаваме со други проблеми во текот на дигитализацијата на одредени процеси. Тоа создава дополнителни непредвидливи ситуации и проблеми и секогаш мора да држиме чекор. Поради тоа секогаш постои впечаток дека постојано доцниме. Но, според мене, тоа е континуиран процес на развој, имајќи предвид дека многу работи се случија последниве дваесетина години како што се движиме во дигиталниот свет, и едноставно мора да прифатиме дека колку повеќе тој се дигитализира толку повеќе ќе треба и ние самите да се дигитализираме. Тоа е „проклетство“ што мора да го прифатиме сите.
А каде е „Киншифт“ на патот на зелената транзиција?
Зелената транзиција е нешто на што можеме да се фокусираме во начинот на кој го развиваме нашиот софтвер. Како да се осигуриме дека нашиот софтвер максимално ја користи потрошената енергија? Како ние, во начинот на кодирање и технолошките избори што ги правиме, можеме да се погрижиме нашите технологии и целиот наш софтвер да работат на максимално содржаен микропроцесор? Значи има многу повеќе од она што го прават сите компании што стануваат позелени, осигурувајќи се дека нивните вработени доаѓаат со велосипед на работа. Има и нешто што може директно да го контролираме, а тоа е како да го направиме софтверот што е можно поефикасен за да ги користи ресурсите од планетата на најефикасен начин.
Какви се Вашите планови во иднина? Што може да очекуваме од „Киншифт“ од аспект на ширење на нови пазари?
Неодамна најавивме дополнителна инвестиција во „Авенга“, компанија што е комплементарна со „Киншифт“. Сега имаме цврста подлога во Европа, па природен потег за нас ќе биде да се движиме кон САД, кои се многу голем пазар. И сега, со нашите капацитети и можности, е добро време да влеземе во САД на посилен начин и тоа ќе биде нашиот следен чекор.
Како гледате на регионот Адрија како потенцијално поле за проширување?
Ние сме многу среќни што сме присутни во овој регион. Многу сме задоволни од нашите луѓе тука. Иако различни делови од Европа имаат различни култури, начинот на кој работиме ние во „Киншифт“ е преку создавање култура што е заедничка за сите региони, за 57 града и 17 земји во кои работиме. Имаме заедничка култура што ги обединува сите тие различни региони. Но се залагаме сите овие мали градови и земји да ја задржат и да ја негуваат својата локална култура во целост. Тоа е единствениот начин да го извадиме максимумот од сите региони во кои сме присутни. Развиваме многу центри за истражување и развој овде во регионот, но имаме и клиенти како од финансискиот сектор во Србија или автомобилскиот сектор во Хрватска. Па така, во исто време услужуваме клиенти и го максимизираме нашиот развој во регионот Адрија со нашиот капацитет за истражување и развој и се надеваме дека сѐ што создаваме тука ќе може да го пренесеме и во САД.
