.webp){kind=icon}
Диверзифицираните портфолија што комбинираат акции, обврзници, фондови и приватен капитал го намалуваат ризикот, а го оптимизираат повратот на инвестициите, вели Игор Мишевски, соосновач на „Опфолио“ (Opfolio), во интервју за „Блумберг Адрија“, на прашањето каде гледа најголем потенцијал за инвестирање.
Мишевски, меѓу другото, препорачува инвестирање во пасивни индексни фондови и активно управувани отворени фондови.
„Исто така граѓаните можат делумно да инвестираат во фондови и акции што следат определен сектор што им е познат, што ќе им помогне да имаат подобра контрола и разбирање на нивните инвестиции“, вели Мишевски.
Игор Мишевски
Bloomberg Adria
Во поглед на акциите, како најперспективни ги истакнува секторите на технологијата, енергијата и здравството, кои, како што вели, нудат високи потенцијали за раст поради зголемената побарувачка за иновативни решенија и одржливи практики.
„Во 2024 година, со тековните воени конфликти и релативно високата инфлација, инвеститорите треба да бидат внимателни и да избираат акции или инвестиции што би биле релативно заштитени од овие околности. Препорачувам да се фокусираат на компании што имаат стабилни приходи и способност да се приспособат на промените на пазарот, а наедно цената на акцијата не е превисока во споредба со нивната вредност. Ние во ’Опфолио’ кога правиме анализа на акциите преку нашата методологија на Опфолио радар, секогаш ги разгледуваме овие фактори за да се осигуриме дека нашите инвестиции добиваат максимална заштита и потенцијал за раст“, вели тој.
Мишевски додава дека обврзниците се добра опција за оние што бараат стабилен приход и помал ризик. Кај македонските граѓани, пак, според него, сè уште меѓу омилените се недвижностите поради стабилноста и долгорочните приходи од изнајмување или продажба.
Игор Мишевски (ТВ-гостување)
Bloomberg Adria
„Сепак недвижностите поседуваат определен ризик на мала ликвидност. Златото, пак, е традиционален избор за заштита од инфлација и нестабилност на пазарот. Иако многу инвеститори во време на инфлација инвестираат во злато, подобра опција е да се разгледаат хартии од вредност што додаваат вредност. Ако инвестираат во злато, подобро е тоа да бидат акции на компании од тој сектор наместо директно во злато. Сепак, моја препорака е покрај претходно наведените фондови, граѓаните да се осврнат и на приватен капитал и инвестирање во приватни компании како содружници или бизнис-ангели“, вели Мишевски.
Соосновачот на „Опфолио“ ја истакнува и потребата од финансиска писменост, која според него има суштинско значење за правилно управување со личните финансии и донесување информирани одлуки за инвестирање.
„Граѓаните можат да ја подобрат својата финансиска писменост преку читање книги за финансии, учество во курсеви за инвестирање и консултирање со финансиски советници. Еден од клучните аспекти на финансиската писменост е штедењето. Применувањето на правилото 75-15-10 може да биде многу корисно: 75 отсто од приходите да се трошат на основни потреби, 15 отсто на штедење што може да го претворат во инвестиции , а 10 отсто на луксузни трошоци. Овој начин напланирање на буџетот може да им помогне на граѓаните да ја одржат својата финансиска стабилност и да создадат основа за идни инвестиции“, вели Мишевски.
