Стабилен економски раст што во 2028 година треба да стигне до 5 отсто, инфлација од два отсто, буџетски дефицит од -2,9 отсто и јавен долг од 59,7 отсто од БДП, е наведено во изборната програма на ВМРО-ДПМНЕ.
„Доколку не се случат непредвидени политички и економски нарушувања на глобално и регионално ниво, постојат услови во периодот 2024-2028 растот на БДП да се движи од 3 до 5,0 отсто“, стои во програмата.
Колку овие ветувања се реални и што треба да биде во фокус на идната владата, анализиравме со Борче Треновски, професор на Економскиот факултет при УКИМ во Скопје и Павле Гацов претседател на Здружението на даночни советници.
Двајцата се согласуваат дека на идната владата ѝ претстојат многу предизвици, а пред сè потребата од реформи.
Треновски посочува дека задолжувањата ќе бидат неопходни во следниот период за да раздолжиме долгови, а има најавено и нови полтики. Меѓутоа, според него се отвораат дилеми по однос на најавата за задолжување од една милијарда евра преку кредит од странска Влада.
Борче Треновски
Bloomberg Adria
„Прво, најавено е како задолжување од некоја држава а сè уште не знаеме која. И прашањето е која е логиката на ова задолжување? Кој е интересот на оној што ни го дава овој кредит? Бидејќи, кога ни даваат странските кредитори заем, како што се Светска банка, ЕИБ, тие имаат определени услови. Браат рационализација на определени политики, бараат да се направат определени структурни промени“, вели Треновски.
Тој додава дека понатаму прашање е за што ќе се употреби кредитот, која ќе биде неговата рамка, која ќе биде неговата намена.
Bloomberg Adria
„Дали тој што ќе ни го даде кредитот ќе нè обврзе на определени реформи, или со определени инвестиции. И уште едно е особено важно прашање е за што ќе ја употребиме таа милијарда. Ако ја употребиме за зајакнување на моторот за раст на нашата економија и капитални инвестиции тогаш може да кажеме дека е во ред, меѓутоа ако ја употребиме за тековни расходи тогаш тоа е проблематично“, вели Треновски.
Тој појаснува дека ако таа една милијарда евра влезе, а не се унапреди системот, не се мониторираат тие расходи и слично - тогаш голема е веројатноста голем дел од тие средства нерационално да се употребат или да не се употребат оптимално како што можат.
Bloomberg Adria
Добро е што бизнисот знае дека новата Влада раскрстува со прогресивното оданочување
Промената на власта е шанса да се променат и политиките кои очигледно не дадоа доволно ефекти во контекст на растот на БДП, но од друга страна и вербата на бизнисот во владините политики беше некако изгубена на крајот од мандатот на претходната Влада. Затоа од новата Влада очекуваме да го исполнува тоа што го ветуваше во рамките на предизборната програма особено во средбите со стопанските комори каде беа презентирани овие економски програми. Имаше забелешки, се зборуваше за теми коишто беа поврзани со бизнисот и очекуваме тоа да биде исполнето, вели Павле Гацов претседател на Здружение на даночни советници.
Павле Гацов
Bloomberg Adria
Гацов смета дека потреба е регуларна гилотина, односно да не се претерува со таа регулатива, регулаторни политики коишто ја одземаат енергијата на бизнисот.
„Но, тука пред сè треба да се засили односно се работи на делот на борба против корупцијата бидејќи тоа ќе биде ветер во грб за бизнисот. Очекуваме операционализација на оние политики што беа ветувани, што се ставени во програмата“, вели Гацов.
Емисија „Зум ин“ со Наташа Стојановска
Bloomberg Adria
Тој додава дека многу е важно што бизнисот веќе знае дека новата Влада раскрстува со прогресивното оданочување, дека останува на рамниот данок бидејќи тоа веќе значи добро планирање на бизнисите.