Дел од парите од унгарскиот заем во износ од една милијарда евра треба да стигне во Македонија наесен, најави премиерот Христијан Мицкоски. Тогаш се очекува на располагање да се стават половина милијарда евра, а Владата уверува дека постапката ќе биде транспарентна и го задолжи Министерството за финансии да подготви закон за заемот. Бизнис-секторот, пак, очекува парите да бидат рационално искористени за помош на стопанството, вели Миле Бошков, претседател на конфедерацијата на работодавци, во интервју за „Блумберг Адрија“.
„Ќе мора дел од парите што ќе се земат како заем од Унгарија да биде насочен кон бизнисот, иако се најавува дека поголемиот дел од средствата ќе биде наменет за локален економски развој, така што можеби преку општините бизнисот ќе треба да биде поангажиран, да развива концепти на јавно приватно партнерство. Ќе биде добро ако парите бидат навистина насочени кон економски развој и да биде вклучен бизнисот“, вели Бошков.
Во исто време опозициската СДСМ изрази загриженост за ваквиот заем и побара законското решение што поскоро да биде доставено до Собранието. А од Сојузот на синдикатите на Македонија (ССМ), пак, порачаа Владата претпазливо да постапува со планот, да се помогне стопанството со овој заем и да не ги прави истите грешки како претходните влади.
Миле Бошков (ТВ-гостување)
Bloomberg Adria
Премиерот Христијан Мицкоски најави дека во октомври ќе бидат достапни 250 милиони евра од унгарскиот заем за бизнис-секторот, а општините со своите проекти ќе може да аплицираат исто така за 250 милиони евра на почетокот на идната година.
Отворена дебата за раст на минималната плата
Бизнис-секторот очекува стабилни и предвидливи цени за енергентите до крајот на годината, за да може производството да биде планирано и стабилно. Од аспект на најавите за раст на минималната плата, во Конфедерацијата на работодавци сметаат дека со синдикатите треба да се разговара за сите теми за да се најде заедничко решение.
„Синдикатите се наши социјални партнери и треба да разговараме. Нашиот став е дека на секторско ниво треба да се разговара за платата и постојано го потенцирам тоа. Ние од утре ја почнуваме анкетата за утврдување на минималната заработувачка, да видиме каков план имаат работодавците, со кои капацитети и, нормално, дали за да ја зголемат платата, ја мерат продуктивноста“, посочи Бошков.
Тој додава оти тоа не значи дека работниците не можат да постигнат одреден план или исполнителност или продуктивност, меѓутоа повеќе е насочено да видиме дали тие знаат како се прави тоа и дали воопшто имаат одредена систематизација и концепт за утврдување минимална или кој било вид ниво на заработувачка.
Бошков смета дека и за прашањето за недела неработен ден треба да се разговара отворено со синдикатите и да се види што е најдобро и за работниците и за економијата, бидејќи во Германија се зборува за четиридневна работна недела, а во Грција е воведена шестдневна работна недела, па затоа треба да се следат околностите на една економија.
.webp){kind=icon}
