Додека компаниите кубурат со кадар, дополнителен притисок се очекува особено во текот на летните месеци, кога дел од работниците оди на сезонска работа надвор од земјава.
„Најпривлечна дестинација за сезонските работници е Хрватска“, посочува во интервју за „Блумберг Адрија“ Дарко Велков, генерален менаџер на „Вработување.ком“.
Дополнителна закана за одлив на кадар се зголемените квоти за работници во Германија.
Дарко Велков
Bloomberg Adria
„Во Германија во моментов, колку што сум информиран, има олеснување на т.н. лотарија и квотите се дуплираа на 50.000 луѓе. Но не е само тоа закана за нашиот кадар. Работите се менуваат, луѓето размислуваат каде можат да најдат работа најблиску и со највисока плата. Тоа што во моментов на пример се случува во Хрватска е поради блиската дистанца и поради тоа што луѓето можат да одат со туристичка виза. Германија дефинитивно ќе има влијание, но пред сѐ мислам дека проблем е немањето наша стратегија. Ние повеќе од 30 години немаме направено план како да бидеме атрактивни“, вели Велков.
Спречувањето на одливот на работници беше фраза што често можеше да се слушне и во текот на изборните кампањи во земјава. Но има ли конкретни мерки и решенија за тоа? Според Велков, на државата ѝ недостига долгорочна стратегија за пазарот на трудот.
„Платата не е пресудна за да се спречи дополнителниот одлив на кадар, туку и други бенефиции и услови со кои талентите ќе се чувствуваат достоинството на своето работно место“, додава тој.
Дарко Велков (ТВ-гостување)
Bloomberg Adria
„Ние во принцип ги имаме луѓето, само треба да се реорганизираме. Факт е дека еден добар дел луѓе повторно ќе заминат. Но ова што го прави Германија на пример е за неквалификуван кадар, значи тие уште сега подготвуваат кадар шо треба да го обучуваат кај нив, а тој ист принцип треба да се примени и кај нас. Ќе посочам и друг пример, во Турција во градежниот сектор инженерите што имаат големи проекти или граделе во име на државата и слично, покрај плата, имаат и додатни бенефиции што им ги дава државата, како на пример специјални пасоши. Значи, државата мора со одредени бенефиции да ги мотивира вработените да останат и да се чувствуваат почитувано и ценето на своето работно место. Тоа мора да го направиме и ние со нашата полиција, царина, образование, здравство... Значи, можеби не можеме да дадеме врвни плати, но државата може да им даде некакви даночни олеснувања или мерки со кои ќе се чувствуваат гордо таму каде што работат и ќе сакаат да останат во земјава“, вели Велков.
Велков го посочува и проблемот со натрупаната јавна администрација, потенцирајќи дека треба да се овозможи терен за дел од тие вработени да премине во приватен сектор.
„Ние имаме огромна јавна администрација, од која дел воопшто не е задоволен со своето работно место. Значи, на тие луѓе што не се задоволни треба да им се даде можност да влезат во приватен сектор преку одредени бенефиции за луѓето и компаниите во кои ќе се префрлат, а кои очајно кубурат со кадар. Доколку е вистина дека постојат луѓе што не одат на работа во јавната администрација а земаат плата, тоа треба веднаш да се расчисти, тоа е недозволиво во која било пазарна економија или општество во кое треба да напредуваат најдобрите“, вели тој.
Според Велков, требаат и законски измени за активирање на пазарот на пензионерите и младите.