Со работници од Непал и од Индија ќе се спасува туристичката сезона

Одливот на работници, кој е еден од најголемите товари на стопанството, се очекува значително да се почувствува во летниот период поради заминувањето на работници на сезонска работа надвор од границите на Македонија.

Освен подалечни дестинации, за голем дел од сезонските работници од регионот Адрија е најатрактивна Хрватска. Македонските работници се позиционираат високо и на листите по бројот на работни дозволи за странци и на словенечкиот пазар на трудот.

Меѓу најзагрозените дејности од дефицитот на работници е туристичко-угостителскиот сектор. Па, спас се бара во увоз на работна сила.

Аркан Керим Bloomberg Adria

„По пандемијата на ковид-19, комплетно се промени сликата за работната сила во туристичкиот сектор за жал, па луѓето се осврнуваа кон посигурни бранши. За годинава имаме договорено со неколку партнерски компании да увеземе работници од Непал, Бангладеш и од Индија. Тој процес веќе почна, а во наредниот период ќе дојде уште поголем број на работници, со што ’ќе се изгаси пожарот’ во оваа индустрија со проблемот со недостигот од работници и се надевам нема да имаме проблем со туристичката летна сезона“, вели Аркан Керим, претседател на туристичко-угостителска комора при Сојузот на стопански комори.

Тој посочува дека увозот на работници е неминовен процес. Минатата година, пак, туристичката сезона ја спасувале средношколци.

Аркан Керим (ТВ-гостување) Bloomberg Adria

„Се надевам дека со овој увоз на работници во иднина ќе се мотивираат и нашите работници да останат во земјава, бидејќи ако дојде поголем број на странци, нашите работници нема лесно да се мотивираат да одат на сезонска работа, затоа што ризикуваат по тие два-три месеци да го изгубат постојното работно место во Македонија“, вели Керим.

Toj вели дека недостигот од работна сила е пречка и за поголеми инвестиции во туристичко-угостителскиот сектор.

Bloomberg Adria

„Ни треба државна стратегија на долг рок за тоа од каде и под какви услови ќе увезуваме работници за да се ублажи ’гладот’ на компаниите. Во спротивно, ниту компаниите не може да се развиваат. Еве, замислете, на пример некој сака да инвестира во нов хотел на охридското крајбрежје. Како ќе влезе во таква инвестиција кога нема со кого да работи“, вели Керим.

А сè поскапата работна сила носи и притисок врз крајните цени. Од тој аспект, Керим потенцира дека инфлаторниот притисок во овој сектор не попушта, а особено се проблем високите трошоци за задолжување.

„Се надеваме дека високите каматни стапки во наредниот период ќе паднат, со што ќе се мотивира стопанството за поголеми инвестиции. Во однос на побарувачката, забележан е раст за претстојните првомајски и велигденски празници и за патување во странство и за туристичките дестинации низ Македонија, но генерално на долг рок ни фалат инвестиции и во сместувачки капацитети. Токму затоа е важно и олабавувањето на монетарната политика, со цел компаниите да се мотивираат да инвестираат со проширување на капацитетите, инвестирање во инфраструктура итн.“, вели Керим.