.webp){kind=icon}
Во регионот Адрија е направен сериозен исчекор во поглед на инвестирањето во обновливи извори на енергија, покажа неодамнешната анализа на аналитичкиот тим на „Блумберг Адрија“, посветена на производството на енергија од сонце и ветер.
Од пред десет години обновливите извори на енергија во регионот бележат трицифрен раст. Сепак, за Македонија и за БиХ во анализата се наведува дека јазот меѓу постојните капацитетите и капацитетите што, во согласност со националните планови за клима и енергија, треба да бидат инсталирани до 2030 година е најголем.
Зоран Митрески (ТВ-гостување)
Bloomberg Adria
Тоа значи дека двете земји ќе „треба да доживеат значаен развој во следниот период, имајќи предвид дека целите од плановите се обврзувачки за сите земји“, се посочува во анализата.
Според некои од оние што се дел од бизнисот со инвестиции во енергија од сонце, како фотоволтаиците, на Македонија ѝ недостигаат и државни инвестиции, но и координација меѓу институциите за креирање стабилен енергетски систем.
Bloomberg Adria
„Во нашата енергетска мрежа нема некои поголеми корекции во последните 30 години, што значи сега со оваа хиперпродукција со инсталирање соларни системи мрежата е преоптоварена во оние дневни часови кога имаме максимално производство, додека во утринските часови имаме недостиг. Тоа би можело да се дополни со синхронизација на други извори од други капацитети, како хидроцентралата Чебрен и слично, но, за жал, и по 14 неуспешни тендери, не се најде партнер за тоа. Ако државата сака да инвестира во такви системи, може да инвестира во јавно-приватно партнерство со самите правни субјекти од земјава или наши луѓе во странство што располагаат со сериозен капитал. Во меѓувреме треба да најдеме начин за балансирање на системот преку батерии со кои би се складирал вишокот енергија“, вели Зоран Митрески, сопственик на компанијата „Ефикс електрикал“.
Bloomberg Adria
Митрески смета дека за подобро управување со енергетскиот сектор е потребно формирање и на посебно министерство за енергетика.
„Како земја имаме огромни капацитети и за инвестиции во обновливи извори на енергија и големи експерти на ова поле, кое имаат големо знаење, но не се на соодветни позиции. Според мене, неопходно е да се формира и министерство за енергетика, кое во моментов ни недостига, со цел да се направи и синхронизација на сите засегнати страни во планирањето на енергетската стратегија на земјата, која е меѓу најважните фактори за развој на стопанството“, вели тој.
Митрески потенцира дека иако повратот на инвестицијата во фотоволтаици сега е намален, поради стабилизацијата на цените на енергентите, инвестирањето во обновливи извори на енергија е значајна инвестиција за бизнисите.
„Повратот на инвестицијата во обновливи извори на енергија пред кризата беше од осум до десет години, сега изнесува приближно од пет до седум години, што значи дека оваа инвестиција и тоа како се исплати, затоа што животниот век на самите соларни централи е 50-60 години, а ако повратот е за максимум седум години, практично по тоа компаниите ќе имаат бесплатна енергија“, вели сопственикот на „Ефикс електрикал“.
