.webp){kind=icon}
Европската комисија ќе претстави план вреден 584 милијарди евра за ремонт на енергетските мрежи за да бидат подготвени да се справат со очекуваниот прилив на електрична енергија од обновливи извори (ОИ).
Извршната власт на блокот следната недела ќе го објави својот план за зајакнување на инвестициите во столбот на енергетската транзиција, особено во прекуграничните врски, за подобра интеграција на офшор обновливите извори на енергија, се вели во нацрт-документот во кој „Блумберг“ имал увид. Планот содржи обврска за забрзување на издавањето градежни дозволи, но и за организирање јавни повици за нови видови финансиска помош, вклучително и помош од Европската инвестициска банка.
„Европските енергетски мрежи се соочуваат со нови предизвици“, се наведува во нацрт-документот, кој може да биде подложен и на измени. „Тие ќе мора да ја задоволат растечката побарувачка поврзана со чиста мобилност, греење и ладење, електрификација на индустријата и почеток на производство на зелен водород.
Енергетските мрежи ќе се соочат со големо оптоварување во наредните години, бидејќи земјите-членки воведуваат повеќе обновливи извори на енергија, при што ветрот и сончевата енергија обично достигнуваат врв во различни периоди од денот и годината. Ова ја нагласува потребата од сè „попаметни“ мрежи кои би имале и способност да складираат енергија.
Во нацрт-документот се истакнува дека 40 отсто од дистрибутивните мрежи на континентот се стари повеќе од четири децении. Потрошувачката на енергија се очекува да се зголеми за 60 отсто до 2030 година.
Планот треба да ја подобри и сајбер-безбедноста на мрежите поради зголемените геополитички ризици по руската инвазија на Украина.
Акцискиот план на ЕУ за енергетски мрежи вклучува:
- Земјите-членки на ЕУ ќе треба да дадат приоритет на проектите од заеднички европски интерес и да идентификуваат нови области на соработка;
- Регулаторите треба да овозможат пофлексибилен енергетски систем кој вклучува способност за складирање на енергија и водород;
- Институцијата ќе наведе како земјите можат да ги поделат трошоците за офшор проекти;
- Приватното финансирање на инвестициите во мрежата ќе се поттикнува преку заеднички инструменти заедно со ЕУ и ЕИБ;
- Властите на ЕУ ќе соработуваат со технолошки компании за зајакнување на дигиталната отпорност на мрежите до крајот на 2024 година.
