.webp){kind=icon}
Отворен Балкан ги подгреа надежите дека регионот конечно ќе се врати на соработка за размена на трговија, услуги и размена на квалитетни работници, но останува прашање како ќе се реализира тој план за да не се случи разочарување на бизнисот, вели во интервју за „Блумберг Адрија“ претседателот на Бизнис-конфедерацијата, Миле Бошков.
„Комплетното напуштање би значело разочарување, гледаме дека луѓето прават стратегии во регионот, особено примерот претходно со Словенија, дека е неопходно да се создаваат стратегиски предуслови за вработување на повеќе луѓе и инвестиции. Тоа значи дека ние со иницијативата Отворен Балкан можеби изгубивме предолго време во планирање. Ние како бизнис-конфедерација дури и заговараме преку унијата на работодавци на Црна Гора да се вклучи, знаеме што значи тоа за пазарот на трудот, знаеме што значи за економијата, за трговијата, за соработката за регионалното поврзување. Меѓутоа, еве, можеме да кажеме дека повторно сме во рацете на политичарите и повторно на некој начин зависиме од економски потенцијални одлуки, само така би можел да го кажам тоа“, вели Бошков.
Блумберг Адрија
Бошков вели дека е потребна поголема соработка меѓу земјите потписнички на Отворен Балкан, како и размена на податоци за тоа колку работоспособна сила живее во Македонија, колку од учениците со завршено средно образование или студентите се подготвени за работа, за да може навремено да се доквалификуваат доколку е потребно.
„Како што споменав, го гледаме и примерот на Словенија, тие вложуваат, се базираат исклучиво на кадарот што го имаат и, нормално, се отвораат за привлекување работници. Така што алтернативата е во локалното законодавство, локалните мерки, начинот на кој го спроведуваме оперативниот план за вработување, сите можни субвенции и едукација што ги имаме во рамките на нашата земја и, нормално, барање алтернативна работна сила исто така и во регионот“, вели Бошков.
Последната анализа спроведена со Меѓународната организација на трудот покажува дека малку се вложува во дигитализацијата, во зголемувањето на продуктивноста и во човечкиот кадар.
„Некои од управителите не знаат што значи продуктивност, не знаат како да ја мерат, воопшто не знаат како да управуваат со човечкиот кадар и затоа секогаш кога станува збор за продуктивност поврзана со плати прашуваат како да дојдат до поголема ефективност, односно поголема продуктивност. Така што мора да се работи на знаење, а тоа знаење исто така да се поткрепи и со вложување во нови форми на управување со човечкиот кадар, дигитализација, вложување во нови процеси, и така да се дојде до продуктивноста. Иако во овие модерни времиња продуктивноста навистина не е тесно поврзана само со капацитетот на работната сила и вештини, туку е поврзана и со модерната алатка за дигитализација во која било смисла на зборот и во која било смисла на трудот за помагање на трудот во економијата“, вели Бошков.
