Од 1 март стартува заедничкиот пазар на труд меѓу Македонија, Албанија и Србија. „Од македонска перспектива за очекување е дека одреден квантум вработени би можеле да се прелеат на подобро платени места, пред сè во соседна Србија, која има многу подобри проекти и инвестициски зафати“, вели Трајан Ангелоски, претседател на ССКМ, во интервју за „Блумберг Адрија“.
„Во овој временски период, во овој процес на движење на работната сила во делот на Отворен Балкан, пред сè очекуваме движење на работна сила од Македонија кон Србија. Но тоа е нормален процес. Во друг временски период, ако има повеќе економски активности, а логично е дека ќе мора да ги создадеме, секако ќе има и луѓе од Србија што ќе дојдат да работат во Македонија“, посочува Ангелоски.
Подготвеност на економијата за четиридневна работна недела
Во однос на четиридневната работна недела, Ангелоски посочува дека треба да се разгледа секоја позитивна идеја. Меѓутоа, тој смета дека на македонскиот пазар на работна сила му престои една голема реформа, а пред сè очекува дека тоа е поврзано со реформа во јавната администрација.
„Очекувам еден голем контингент вработени од јавната администрација евентуално да се преселат во приватниот сектор. Понатаму ќе видиме како ќе се одвиваат процесите. Генерално, треба да се зголеми ефикасноста на работењето, треба да се дигитализираат процесите, да се извлече максимумот од сите други работи и на крајот можеме да разговараме за оваа четиридневна работна недела каде што со врвни перформанси ќе можеме да го замениме остатокот од времето, овој петти ден да го префрлиме во овие четири“, вели Ангелоски.
Но тој додава дека сепак во делот на дигитализација Македонија заостанува.
„Мислам дека апсолутно заостануваме. Тука имаме еден долг процес на инвестирање, на развој, процес во кој ќе мораме да ги видиме сите оние скриени загуби што ни се случуваат во секојдневното работење. Секаде на оние места каде што ќе можеме да направиме адекватни заштеди со вклучување на техниката, мануелните процеси да се скратат“, заклучува Ангелоски.