Македонија може да добие тргување со крипто без данок, а што по смртта?

Дваесет дена по завршувањето на изборите во САД и победата на републиканскиот кандидат Доналд Трамп, вредноста на биткоинот полета. Од нешто на 63.200 долари, колку што чинеше на денот на изборите, на 5 ноември, вчера надмина 98.500 долари. Веќе не се поставува прашањето дали ќе ја помине психолошката граница од 100.000 долари.

Според најновиот извештај на „Трипл А“, 6,8 отсто од светската популација или вкупно 562 милиони луѓе низ светот поседуваат дигитални валути. Тоа претставува раст од 33 отсто во споредба со минатата година.

Истиот извештај покажува дека најголем број или околу 34 отсто од сопствениците на криптовалути се млади луѓе на возраст од 24 до 35 години. Следната возрасна група се лицата од 35 до 44 години.

Според овој извештај, во земјава заклучно со лани имало 25.111 лица што поседуваат криптовалути или 1,20 проценти од вкупната популација.

Дали сопствениците на крипто плаќаат данок?

Криптото во земјава останува во сивата зона, но Владата најавува регулација на секторот. Тоа е наведено во програмата на владејачката партија со која ги доби изборите годинава.

Во неа се наведува дека ќе се пристапи кон „дефинирање на криптовалутите (криптосредствата), како специфичен вид нематеријално средство засновано на дигитални технологии“.

Понатаму во програмата на ВМРО-ДПМНЕ се нагласува дека ќе бидат предвидени можности банките во Македонија да можат да продаваат и да чуваат криптосредства на приватни правни и физички лица и на институционални инвеститори, со цел физичките и правните лица да можат да купат биткоини, етереуми и други криптовалути во банка.

„Идната влада на ВМРО-ДПМНЕ предвидува и директни погодности за инвеститорите, како што се: 0 отсто данок на додадена вредност (ДДВ) за тргување со криптосредства и ослободување од данок на капитална добивка за инвеститорите до 2026 година“, се наведува во партиската програма на најголемата партија во власта.

Во недостиг од прецизна регулатива, материјата се регулира преку постојниот закон за личен данок на доход, што значи дека сопствениците треба сами да се пријават преку поднесување годишна даночна пријава до Управата за јавни приходи.

„Остварените добивки се третираат како капитални добивки идентично како и другите хартии од вредност како што се акции и слично. Кога станува збор за криптовалути, потребно е да се зачува целокупната документација за трансакциите со криптовалути, вклучувајќи ги и потврдите за купување и продажба, бидејќи тоа ќе помогне во докажување на добивките и како да се пресмета данокот што треба да се плати со цел парите што се добиени по основ на капитална добивка да може целосно да се легализираат и да се префрлат на сметка во банка“, објаснува за „Блумберг Адрија“ адвокатката Слаѓана Штимац.

Приватна архива

Што по смртта?

Колку и да звучи морбидно, наследувањето на криптото не смее да биде табу. Пример за тоа е Метју Муди, 26-годишен сопственик на крипто што загина во авионска несреќа. Неговите родители знаат дека поседувал крипто, но не знаат колку ниту како да пристапат до имотот.

Во не дај боже ситуација, во случајот со криптото, пребарувањето низ компјутерот може да заврши мала работа. Оттука не е ни чудно што околу 20 отсто од вкупните криптосредства се сметаат за изгубени, сеедно дали е тоа преку загубени лозинки или смрт на сопствениците.

„Со оглед на тоа што криптовалутите се област што сè уште не е доволно регулирана и истовремено е тајна, за да можат истите тие да бидат предмет на оставинска постапка е потребно да се има информации и точни податоци за криптовалутите, во спротивно истите тие не може да бидат предмет на наследување. Доколку оставителот односно сопственикот на криптовалутите своеволно во тестамент ги наведе корисничкото име и логот, истите тие се предмет на наследување“, вели Штимац.