Криптоеуфорија и во Македонија: Со биткоин се купуваат јајца

Подемот на биткоинот по победата на Доналд Трамп на претседателските избори во САД е значаен настан во финансискиот свет. По изборната победа на републиканскиот кандидат, биткоинот достигна невидени височини, надминувајќи над 90.000 долари (последната пробиена граница до пишувањето на текстот беше над 93.000 долари). Овој раст е поттикнат од очекувањата за администрација, која би била попријателски настроена кон криптовалутите, бидејќи Трамп се префрли од скептик во поддржувач на дигиталните средства за време на неговата кампања.

Постојат некои микропоказатели дека целиот овој криптооптимизам од преку барата се префрла и кај нас. Така на пример на социјалните мрежи деновиве може да се сретнат објави во кои се наведува дека скопска фарма прифаќа плаќања за нејзините органски и свежи јајца со криптовалути.

„Поддржуваме биткоин, етереум, лајткоин и други (вклучувајќи и провизија) за да ви овозможиме брзо и безбедно плаќање“, стои на официјалната фејсбук-страница на фармата.  

До каде ќе расте биткоинот и колку ќе се распространи?

Најголемата криптовалута порасна за повеќе од 35 отсто по победата на Трамп на 5 ноември. Во средата достигна рекорд од 93.462 долари, пред да го намали растот. Тоа, пак, на дофат на раката ги става некогаш фантастичните прогнози за цена од 100.000 долари.

„Сто илјади долари е вредност на биткоинот што е многу веројатно дека ќе ја достигне до крајот на годината, најверојатно во скоро време, можеби за недела-две, бидејќи гледаме многу голем раст по изборот на Доналд Трамп“, вели Александар Тасевски, еден од основачите на криптоздружението „Кон месечината“ (2 The Moon).

Александар Тасевски Приватна архива

Сепак, тој нагласува дека цената на биткоинот зависи единствено од понудата и побарувачката и потсетува на пример од пред три години, кога, како што вели, многумина во секторот очекувале дека ќе биде пробиена границата од 100.000 долари, но не се случило тоа, односно биткоинот застанал на околу 69.000. 

Ветувањата на Трамп дека ќе ги направи САД лидер во криптовалутите и неговите планови за создавање стратегиска национална резерва од биткоин одекнаа кај инвеститорите. Амбицијата на неговата администрација за регулаторна јасност и поддршка за блокчејн-технологијата дополнително ја зголеми довербата на пазарот. Постизборниот период виде значителен прилив на капитал во биткоин и други криптовалути, одразувајќи го оптимизмот на пазарот за иднината на дигиталните средства под водство на Трамп.

Од друга страна, останува отворено прашањето за тоа дали новоизбраниот американски претседател и неговите републикански законодавци прво ќе се фокусираат на поприоритетни прашања, како политиката кон Кина и економијата на САД, потиснувајќи ги законите за дигиталните средства на пониско место во агендата. 

„Под администрацијата на Трамп верувам дека биткоинот ќе расте, а дали ќе влезе во поширока примена во САД зависи од времето на реализација на каква било трансакција. Значи, во моментов доколку чекате пет минути, 20 минути, половина час или час за да помине трансакција на каса, тогаш нема резон, бидејќи тоа може на друг начин да се заврши за секунда-две. Постојат алтернативи, како Лајтнинг нетворк (Lightning Network), што ги отстрануваат тие недостатоци, но до каде ќе оди биткоинот во масовното прифаќање - сигурно е дека некаде ќе оди, но дали ќе стигне до тоа да се плаќа во секоја трафика, засега не би можело да се шпекулира“, посочува Тасевски.

Досега растот на вредноста на биткоинот имаше ефект врз поврзаните акции и компании со значителни резерви од биткоин, како што се „Коинбејс“ (Coinbase) и „Микростратеџи“ (MicroStrategy), кои забележаа значително зголемување на цените на нивните акции. Општото чувство во криптозаедницата е возбудување и очекување, бидејќи многумина веруваат дека политиките на Трамп можат да го отворат патот за поширока примена и интеграција на криптовалутите во главниот финансиски систем.

Вредност од половина милион долари

Иако Тасевски не сака неговите очекувања за вредноста на биткоинот во наредните години читателите да ги земат здраво за готово, сепак вели дека пробивањето на границата од 100.000 долари би отворило можност за достигнување нови фантастични нивоа.

„Според она што го зборуваме дека 100.000 долари се на дофат на рака, дали ќе оди на 200.000 или можеби 500.000, лично не би ме изненадило и милион, но не сакам да прејудицирам, да оставиме и да видиме како ќе реагира пазарот и како ќе ја прифаќа криптовалутата. Јас верувам дека биткоинот и другите криптовалути ќе одат нагоре токму поради децентрализацијата и нивната основна намена за која се замислени“, посочува тој.

Слична изјава во овој контекст пред неколку дена даде основачот на „Галакси диџитал“ (Galaxy Digital), Мајкл Новограц, кој предвиде дека цената на најголемиот токен може да се искачи на 500.000 долари ако се спроведе идејата за создавање стратегиска национална резерва од биткоин во САД, иако изрази и сомнежи околу таквиот потфат.

 

 

„Ако добиеме резерва од биткоин, како човек што поседува многу биткоини, нема да се жалам“, рече Новограц во интервју за телевизијата „Блумберг“. „Мислам дека биткоинот ќе достигне 500.000 долари. Тоа е различна парадигма затоа што ги принудува сите други земји да се вклучат“.

Другите криптовалути ќе го следат подемот

Тасевски очекува ваквиот експлозивен раст на биткоинот да ги понесе и другите криптовалути, односно барем оние што, како што вели, се поставени на чесна основа.

Ова го потенцира бидејќи, според него, има многу што фатиле погрешен правец.

„Тука мислам на луѓето што создаваат криптовалути со нечесни и лоши намери, со намера да го искористат незнаењето на другите и да ја искористат еуфоријата, па да профитираат од тоа. Има многу измами во криптосветот, а ако сите измами ги тргнеме настрана, тогаш може да се каже дека криптовалутите имаат многу светла перспектива“, нагласува тој.

Тука ги издвојува криптовалутите што се носители на некој блокчејн. 

„Тоа се 10-20 криптовалути т.н. коини, за разлика од токените, кои се валути што немаат свој матичен блокчејн. Генерално, оние криптовалути што се поставени на чесна основа, без цел за измама, имаат доста светла иднина“, заклучува еден од основачите на криптоздружението „Кон месечината“.

 

Напомена: Вложувањето во криптовалути носи ризици, сите информации во овој текст се од информативен карактер и не треба да се разбираат како поттик за инвестирање.