Италија е подготвена да ја заостри регулацијата за дигиталните средства и да ја зголеми претпазливоста во врска со тргувањето со криптовалути од 2023 година, откако слични потези презеде Португалија. Со одредбата предложена во буџетот за 2023 година се планира проширување на данокот за капитални добивки од 26 проценти за добивка од дигиталните имоти поголема од 2.000 евра.
Италијанските даночни власти досега ги третираа дигиталните валути и токените како странска валута, што подразбираше пониско оданочување.
Нацрт-законот, кој го предложи владата на премиерката Џорџи Мелони, дава можност даночните обврзници да ја пријават вредноста на имотот од 1 јануари 2023 година, со што ќе платат помал данок од 14 отсто. Целта е да се поттикнат Италијанците да ги пријавуваат своите дигитални имоти. Предложениот закон, кој би можел да биде изменет во парламентот, вклучува и обврска за откривање на податоците и проширување на таксата за криптовалути.
Построгиот став на Италија доаѓа откако Португалија, една од европските земји со најголема криптокултура, во октомври го претстави својот план за оданочување на краткорочните добивки од дигиталните имоти во висина од 28 проценти.
Во Италија околу 1,3 милион луѓе или 2,3 проценти од населението поседуваат криптовалути, што е значително помалку отколку во Обединетото Кралство, каде што дигитални валути поседуваат околу пет отсто од населението, додека во Франција тоа е случај со 3,3 проценти од вкупниот број жители.
Новите правила доаѓаат по долготраен пад на цените на дигиталните средства, што го забрза падот на неколку од големите платформи за криптовалути. Бранот банкроти и шпекулативни колапси, вклучувајќи го и неодамнешниот крах на берзата ФТХ, ги наведоа регулаторите на глобално ниво да го заострат надзорот над овие средства.
.webp){kind=icon}
Во моментов нема коментари за веста. Биди прв да коментира...