Министри од регионот во Скопје ќе преговараат за планот на ЕУ за раст на Западен Балкан

На 17 ноември во Скопје на министерски состанок од регионот пристигнуваат сите министри за финансии, економија и главни преговарачи за преговарање на условите за Планот на ЕУ за раст на Западен Балкан, кој ќе обезбеди поврзување, поддршка на реформите и финансиска поддршка во вид на грантови и поволни заеми. 

Планот е подадена рака од ЕУ кон земјите од Западен Балкан, која треба да се искористи да се создададат поволни економски услови за граѓаните и приватниот сектор. Ваквата констатација била истакната на денешната средба на министерот за финансии Фатмир Бесими со амбасадорот на ЕУ во земјава, Дејвид Гир.

Како што се посочува во соопштението на Министерството за финансии во однос на овој состанок, со Планот за раст се дава поддршка за економска интеграција на земјава во единствениот пазар на ЕУ, понатаму зајакнување во поврзаноста на заедничкиот регионален пазар, забрзување на фундаменталните реформи и зголемување на финансиската помош за поддршка на реформите преку Инструментот за реформи и раст. 

„Подобрувањето на економската интеграција во единствениот пазар ќе се одвива преку обезбедување на слободно движење на стоки, услуги и работници, пристап до Единствената платежна област, олеснување на патниот транспорт, интеграција во индустриските синџири на снабдување, интеграција и де-карбонизација на енергетските пазари, како и во дигиталниот единствен пазар. Земјите од Западен Балкан ќе бидат поканети и да подготват реформска агенда и да ја поднесат во рок од три месеци од стапувањето во сила на Регулативата за воспоставување на Инструмент за реформи и раст за Западен Балкан. Инструментот за реформи и раст за Западен Балкан - ќе опфати период од 4 години (2024-2027) со финансиска поддршка од 6 милијарди евра“, се наведува во соопштението.

На состанокот меѓу министерот Бесими и евроамбасадорот Гир било посочено и дека подготвената реформска агенда од страна на земјите од Западен Балкан ќе биде клучен двигател на Планот за раст, односно нејзиното исполнување ќе придонесе за искористување на можностите на единствениот пазар на ЕУ и користење на Инструментот за реформи и раст, со кој во период од 2024 до 2027 година стојат на располагање неповратни средства до 2 милијарди евра и поволни заеми, во износ до 4 милијарди евра. 

Фокусот на реформите треба да биде на зелената агенда, дигитализација и иновации, како и декарбонизација, односно енергетска транзиција од јаглен кон обновливи извори на енергија.

ЕК вчера ги објави извештаите за напредокот на земјите од Западен Балкан, заедно со Планот за раст на регионот.

Во моментов нема коментари за веста. Биди прв да коментира...

Остави коментар