Од денеска домаќинствата повторно ќе имаат евтина дневна тарифа на струјата, во периодот од 13 до 15 часот, со што вкупно 11 часа ќе имаат на располагање евтина електрична енергија во текот на едно деноноќие од понеделник до сабота и 24 часа во недела.
Цената на електричната енергија на пазарот во текот на денот, особено во периодот од март до ноември, е за два-три пати пониска и тоа е главниот фактор за воведувањето на евтината тарифа, велат од Регулаторната комисија.
„Од денеска почнува дневната евтина тарифа за домаќинствата, која ќе важи од 13 до 15 часот. Оваа одлука е пазарен механизам затоа што прекуден цената за струја на берзите е до трипати поевтина отколку навечер. РКЕ по направените анализи оцени дека се создадени услови домаќинствата да користат дополнителни часови во кои надоместокот за потрошената електрична енергија ќе се пресметува по евтина тарифа“, вели претседателот на РКЕ, Марко Бислимоски.
МИА
Од Регулаторната комисија појаснуваат дека денеска околу 170 илјади домаќинства ќе добијат дневна евтина струја од 13 до 15 часот. Тоа се сите што имаат дигитални броила. Преостанатите 650 илјади евтината тарифа ќе ја добијат во текот на декември, затоа што нивните струјомери треба рачно да се приспособат. Проблем ќе бидат домаќинствата кај кои се недостапни броилата.
.webp){kind=icon}
