Регулаторната комисија за енергетика (РКЕ) за 35 отсто ја намали цената на парното греење за сите деловни корисници во Скопје. Одлуката за намалување на цената се темели на намалувањето на цената на природниот гас на светските берзи.
„Резултатите покажаа дека во изминатиот период цената на природниот гас на берзата е пониска од предвидената, со што се исполнуваат условите да се донесе поволна одлука за категоријата други корисници, кои, пак, во турбулентниот период на енергетската криза го презедоа товарот и добиваа реални сметки за разлика од домаќинствата, кои во целиот изминат период на енергетска криза добиваа сметки со субвенции. Верувам дека со тоа ќе овозможиме и тренд на зголемување на бројот на нови потрошувачи што се од категориите пред сè на деловни корисници“, вели претседателот на РКЕ, Марко Бислимоски.
МИА
Со новата одлука ќе се намалат февруарските сметки за топлинска енергија за училиштата, деловните корисници, јавните институции, со што пониски сметки за парно ќе добијат околу 1.200 потрошувачи приклучени на централното градско греење. Сметките за потрошена топлинска енергија на домаќинствата засега нема да се намалуваат затоа што се субвенционирани од страна на Владата со дваесетина проценти.
„Цената за домаќинствата во овој момент е за 75 проценти пониска отколку цената на деловните корисници. Претходно таа разлика беше некаде 2,7 пати. Ја следиме ситуацијата на пазарот за природен гас и доколку се исполнети условите, апсолутно ќе пристапиме кон носење нова одлука и за цената на домаќинствата. Субвенциите се обезбедени, префрлени се на сметката на ЕСМ и сите сметки до крајот на грејната сезона ќе ги субвенционира“, вели Бислимоски.
Според податоците на РКЕ, вкупно 65.000 потрошувачи се снабдуваат со топлинска енергија во Скопје, а само од почетокот на грејната сезона досега се приклучени околу 1.000 нови корисници.
.webp){kind=icon}