Осигурителните компании објавија нов ценовник за полисите. Цената на полисата за автоодговорност е зголемена за 15,4 отсто. Па така, наместо досегашните 5.453 денари за полиса за осигурување за автомобил од 44 до 55 киловати, сега треба да се издвојат 6.292 денара или 893 денари повеќе.
Полисата за автоодговорност за возила од 55 до 66 киловати чинеше 6.166 денари, а со новите цени таа ќе чини 7.115 денари. За возилата од 66 до 84 киловати, граѓаните ќе треба да платат полиса од 8.233 денари, или 1.099 денари повеќе. За 15,4 отсто се зголемени и цените на полисите за возила над 110 киловати, односно наместо 10.294, колку што се плаќаше досега, ќе се плаќа 11.878 денари.
За возилата до 44 киловати цените на полисите за автоодговорност остануваат исти. Информацијата за покачување на цените осигурителните компании ја добиле во понеделникот. Тие биле известени од страна на Националното биро за осигурување. Во информацијата било наведено дека новите цени треба да се применуваат од четврток, случајно или не, ден по изборите.
Одлуката за зголемување на цената на полисите, според Агенцијата за супервизија на осигурувањето, е неоправдан чекор на осигурителните компании.
МИА
„По добиените известувања од осигурителните компании дека ќе ја зголемат цената, направени се актуарски пресметки за проверка. По извршените актуарски пресметки, утврдено е дека зголемувањето на цената, со дадените образложенија, не е оправдано. Поради тоа АСО го информира и достави предлог до Министерството за финансии, во рамките на неговите законски надлежности, да иницира подготвување и донесување нова тарифа на премии за задолжително осигурување од автомобилска одговорност и со тоа да го ограничи износот на режискиот додаток, што ќе овозможи намалување на цената на полисите за задолжително осигурување од автомобилска одговорност“, соопштуваат од Агенцијата за супервизија на осигурувањето.
Осигурувањето од автомобилска одговорност е задолжително осигурување во согласност со Законот за задолжително осигурување во сообраќајот. Со тоа осигурување се покрива одговорноста на сопственикот за штети причинети на трети лица, кои за последица може да имаат смрт, повреда, нарушување на здравјето, оштетување и уништување предмети. Цената за осигурувањето од автоодговорноста ја утврдува комисија за автоодговорност при Владата на Република Македонија. Владата на Република Македонија носи одлука за висината на минималната и максималната техничка премија.
.webp){kind=icon}
