.webp){kind=icon}
Министерот за економија, Крешник Бектеши во денешното гостување на телевизијата „Блумберг Адриа“ најави дека веќе се подготвува предлог-одлука за прогласување енергетска кризна состојба во државата од 1 септември, годинава.
Тој објасни дека според законската регулатива Владата може да прогласи кризна состојба за период од 30 дена и дека потоа за продолжување одлучува Собранието. Бектеши информира дека предлог-одлуката за прогласување кризна состојба во енергетиката деновиве ќе биде испратена до Управувачкиот комитет и дека најверојатно ќе се најде на дневен ред на една од седниците на Владата закажани за овој месец.
Тој соопшти дека се подготвени пакет лесни мерки за штедење на енергија, пред се кај институциите кои ќе треба да бидат добар пример за штедење кој би се пресликал кај домаќинствата и стопанството.
Бектеши најави зголемување на производството на струја од ЕСМ за да се задоволат потребите на домаќинствата, пред се од хидроелектраните кои сега не произведуваат струја освен за системски потреби, а со цел да се сочува хидропотенцијалот за зимските месеци.
Тој се осврна и на процедурите за нови инвестиции во обновливи извори на енергија од страна на приватниот сектор и домаќинствата, како и на подготовките за антикризни мерки од страна на Владата за кои што рече дека ќе бидат таргетирани кон најранливите категории граѓани.
