Законски измени: Владата влегува во битка со нелегалните онлајн коцкарници

Министерство за дигитална трансформација подготвува предлог-закон за измени и дополнување на Законот за електронски комуникации кои имаат за цел да ги спречат македонските граѓани да се коцкаат и да играат игри на среќа на интернет платформи кои оперираат од странство и не се регистрирани за оваа дејност согласно македонските закони.  

Во нацрт извештајот за проценка на влијанието на новата регулатива се констатира дека бизнисот со игри на среќа е во подем во земјите на Западна Европа, како и дека во Македонија постоењето и масовното приклучување на нелегални интернет платформи за приредување интернет (он лајн) игри на среќа е широкораспространет феномен кој резултира во сериозни негативни реперкусии по целото општество, а пред се младите категории граѓани, кои се во интензивен психосоцијален развој.

„Со достапноста на мобилните телефони коцкањето преку интернет е достапно во секое време и на секое место, со пари на сметка кои не се доживуваат како реални средства и кои полесно и побрзо се трошат. Психолошките науки ја сметаат оваа форма на зависност далеку поопасна од класичните форми на коцкање“, се наведува до документот.

Во него се додава дека компулсивното учество во игри на среќа и забавни игри, не е само финансиско прашање, туку влијае на сите сегменти од животот, вклучувајќи ја работата и кариерата, пријателите, семејството, па и многу повеќе од тоа.

„Евидентно е масовното приклучување на нелегални интернет платформи за приредување интернет (онлајн) игри на среќа од страна на граѓаните, одлив на девизни средства од државата кон странство  кое, во ова време, е повеќе од недопустливо за економијата, како и непочитување на законската забрана утврдена во член 19 од Законот за игрите на среќа и за забавните игри којашто ги ограничува нашите граѓани за учество во игри на среќа на странски веб страници за интернет игри на среќа“, пишува во документот.

По задолжение на Владата, Министерството за дигитална трансформација неодамна организирало состанок со претставници на Агенцијата за електронски комуникации, МАРнет и Државна лотарија на кој се дискутирале понатамошните начини на постапување по оваа проблематика. 

„На состанокот беше разгледана и анализирана опцијата МАРнет, по добиен допис од Државна лотарија, да ја забрани регистрацијата на мк домеини кои постапуваат спротивно на прописите кои го уредуваат начинот на организирање и спроведување на интернет игрите на среќа“, се наведува во документот.

Со оглед на тоа што постоечкиот Закон за електронски комуникации утврдува дека пристапот до и користењето на услуги и апликации преку јавните електронски комуникациски мрежи може да се ограничи само врз основа на судска одлука во случаи утврдени со посебен закон, се анализирале и потребните законски измени со кои ќе и се овозможи на Агенцијата за електронски комуникации на транспарентен и објективен начин да ограничува пристап до користење на услуги преку јавните електронски комуникациски мрежи, односно да забрани пристап до нелегални интернет платформи за приредување на интернет игри на среќа.