Скопје меѓу лидерите во регионот: Колку се заработува од издавање стан?

Интересот за кирија во 2024 година се намалил во однос на претходната 2023 година. Според податоците на Агенцијата за катастар на недвижности, во текот на минатата година биле склучени вкупно 8.481 договор за закуп по сите основи. Договори за станови под кирија имало 2.979.

Според договорите, вредноста на сите закупи лани е пониска во споредба со 2023 година, но кај становите има мал раст.

Есенските месеци, на стартот на академската година, се најплодни кога станува збор за склучување договори за закуп на станови. Тогаш нивната вредност станува шестцифрена.

Растат приносите од издавање станови

Податоците на алатката за пазарот на недвижности во светот „Глобал проперти гајд“ (www.globalpropertyquide.com) покажуваат дека бруто-приносот од издавање стан во првиот квартал од годинава изнесува 6,47 отсто, што е раст во однос на 6 отсто што биле измерени во истиот период лани.

Истражувањето спроведено во февруари годинава покажува дека просечниот принос за издавање станови во Скопје изнесува 6,7 отсто, а лани во истиот период изнесувал 5,37 отсто.

Најмногу се заработува ако издавате голем стан во Карпош, тогаш приносот надминува девет отсто. Ако имате гарсониера, најдобро е таа да е во Центар.

Во истиот период растеле приносите и во Штип, од ланските 6,34 на сегашните 6,69 отсто. Во Битола годинава има мал пад на бруто-приносите на 6,35 отсто, од 6,63 отсто во првиот квартал лани.

Податоците на „Глобал проперти гајд“ покажуваат дека просечната кирија за двособен стан во центарот на Скопје изнесува 350 евра.

Приносите во земјава се меѓу највисоките во регионот

Од земјите во регионот поголема заработка од издавање стан во Скопје има само во Белград. Просечниот принос во првиот квартал годинава изнесува 8,25 отсто. Приносите во главните градови од земјите членки на Европската Унија се значително пониски.

На дното на листата по висината на приносите се градовите во најбогатите европски земји – Луксембург, Цирих и Осло.