Македонски феномен: Најсиромашни, ама најголеми газди на станови

Македонските граѓани се меѓу најсиромашните во Европа ако се земе предвид дека БДП по жител според стандардот на куповната моќ лани изнесувал 41, односно не бил ниту половина од европскиот.

Сепак, најголем број македонски граѓани живеат во сопствени станови и куќи, што не може да се каже за населението во повеќето европски земји, каде што значителен процент живее под кирија.

Имено, според новите процени на Државниот завод за статистика (ДЗС), дури 91,9 проценти од 598.632 домаќинства во земјава се сопственици на живеалиштата во кои престојуваат, што е многу над просекот во ЕУ, кој лани изнесувал 69,2 проценти.

Во какви станови живеат македонските граѓани?

Податоците на Државниот завод за статистика откриваат дека всушност поголем дел домаќинства во Македонија живеат во станови што имаат над 70 квадрати и три односно четири соби. Во гарсониери односно еднособни станови живеат вкупно пет проценти од домаќинствата.

Во однос на комоцијата, интересно е да се нагласи дека 23,9 проценти од домаќинствата живеат во станови што имаат површина од 81 до 100 квадратни метри, а 10 проценти во живеалишта со површина од над 120 квадрати.

Цените растат

Според податоците на Народната банка, цените на становите во Скопје се зголемиле за осум проценти во третиот квартал од годинава споредено со истиот период минатата година. Со тоа продолжува растот на цените на недвижностите во главниот град, но со мало забавување ако се земе предвид дека, според индексот на цените на становите на НБРМ, годишниот раст во вториот квартал бил 11,5 проценти. 

„Блумберг Адрија“ веќе пишуваше дека показателот на пазарната во однос на фундаменталната вредност на становите во просек за 2023 година укажува дека домашните цени на становите се преценети. Имено, според НБРМ, пазарната вредност на становите во просек за 2023 година била преценета за 10,1 проценти, што е намалување за 1,7 процентен поен во споредба со просечната преценетост за 2022 година, но и натаму е над преценетоста од 4,4 проценти во 2021 година.

„Резултатите според динамичниот капацитет на позајмување посочуваат кон повисока просечна преценетост за 15 проценти во 2023 година. Овие наоди се јавуваат како резултат на продолженото зголемување на цените на становите и растот на каматните стапки на новоодобрените станбени кредити“, пишува во извештајот за финансиска стабилност на Народната банка.

Во него се укажува дека становите со просечна пазарна вредност не им се достапни на домаќинствата што располагаат со просечен расположлив доход при тековните пазарни услови.

„Со други зборови, становите со просечна пазарна вредност им се достапни на домаќинствата што располагаат со натпросечен доход, додека другите домаќинства се принудени да се пренасочат кон станови со пазарна вредност пониска од просечната, односно со пониска цена по квадратен метар или со помала површина“, наведуваат од Народната банка.

Во моментов нема коментари за веста. Биди прв да коментира...

Остави коментар