Раст на цените на становите во Скопје од осум проценти во третиот квартал

Цените на становите во Скопје се зголемиле за осум проценти во третиот квартал од годинава споредено со истиот период минатата година, покажуваат новите податоци на Народната банка. Со тоа продожува растот на цените на недвижностите во главниот град, но со благо забавување ако се земе предвид дека според индексот на цените на становите на НБРМ, годишниот раст во вториот квартал бил 11,5 проценти.  

„Блумберг Адрија“ веќе пишуваше дека показателот на пазарната во однос на фундаменталната вредност на становите во просек за 2023 година укажува дека домашните цени на становите се преценети. Имено, според НБРМ пазарната вредност на становите во просек за 2023 година била преценета за 10,1 проценти, што е намалување за 1,7 процентен поен во споредба со просечната преценетост за 2022 година, но и натаму е над преценетоста од 4,4 проценти во 2021 година.

„Резултатите според динамичниот капацитет на позајмување посочуваат кон повисока просечна преценетост за 15 проценти во 2023 година. Овие наоди се јавуваат како резултат на продолженото зголемување на цените на становите и растот на каматните стапки на новоодобрените станбени кредити“, пишува во извештајот за финансиска стабилност на Народната банка.

Во него се укажува дека становите со просечна пазарна вредност не им се достапни на домаќинствата што располагаат со просечен расположлив доход при тековните пазарни услови.

„Со други зборови, становите со просечна пазарна вредност им се достапни на домаќинствата што располагаат со натпросечен доход, додека другите домаќинства се принудени да се пренасочат кон станови со пазарна вредност пониска од просечната, односно со пониска цена по квадратен метар или со помала површина“, наведуваат од Народната банка.

За разлика од забавениот раст на цените на станбените објекти кај нас, во другите европски земји се забележува нивно намалување, односно во 2023 година просечниот годишен пад на цените на становите во Европската Унија и во еврозоната изнесува 0,3 и 1,1 проценти, соодветно.

 

Во моментов нема коментари за веста. Биди прв да коментира...

Остави коментар