За 13,3 проценти се зголемиле цените на становите во Скопје во вториот квартал

Цените на становите во Скопје се зголемиле за 13,3 проценти на годишно ниво во вториот квартал од 2026 година, според Народната банка. Станува збор за благо забавување на растот на цените на становите во Скопје ако се земе предвид дека во првиот квартал од годинава Народната банка забележа годишен раст од 16,6 проценти.

Сепак, овие податоци треба да се земат со резерва со оглед на тоа што индексот на цени на станови што го изработува Народната банка се базира на податоци кои се однесуваат на огласени станови за продажба на територија на градот Скопје, а не на податоци за продадените станови.

„Блумберг Адрија“ неодамна пишуваше дека според податоците на Агенцијата за катастар на недвижности во првиот квартал од годинава има пад на бројот на реализирани трансакции на пазарот на недвижности. Во споредба со последното тримесечје од минатата година, бројот на продадени станови во периодот од јануари до март 2026 година е намален за 27 проценти, а нивната вкупна финансиска вредност е намалена за 23 проценти.

За 23 проценти е намален и бројот на продадени куќи, a пад на квартално ниво има и кај продажбата на земјоделско земјиште и шуми за 8 проценти, како и кај продадените деловни простори за 11 отсто.